﻿Egvu-Ọma.
91.
Onye nọ lẹ mkpuli Ọkaribe-Kakọta-Nụ a-nọdu l'agu Ọkaribe-Kakọta-Ike tụta ume. 
Mu e-kfuru Ojejoje: “L'ọo ya bụ ẹke mu nọ l'ezeru ndzụ; bụru iya bụ a-gbabe-a-dzụru nke mu. Ọ bụ yẹbedua bụ Nchileke, mu dakoberu.” 
Ọ kwa iya a-dzọfuta ngu; t'ẹ b'ị nma l'ọnya, ndu achị nta ngu gbabẹru ngu. Ọ kwa iya phụ a-dzọfuta ngu l'ẹjo iphe-ememe, dzuru ẹkemeke. 
Ọ bụ ẹ́bà iya bẹ oo-gude kpuchita ngu; bụru lẹ mkpuli nku iya; bẹ ịi-gbabe; zeeru ndzụ. Oo-gude kẹle ya bụ o-me-g'o-kfuru gbochita ngu; t'ẹ b'ọ dụ iphe e-me ngu nụ. 
Ẹjo iphe anọduje eye madzụ egvu l'ẹnyashi b'ẹ tịi tsụhedu egvu; tịi tsụ iya iphe-kpaa, anọduje eme l'eswe. 
Ẹjo iphe-ememe, anọduje aphụ kọjokojo l'echi-abalị ta dụdu ọphu ịitsukwadu egvu; mbụ jeyekpo lẹ ndu ọphu anọduje egbushi madzụ l'echi oke-eswe. 
Ụnu ụmadzu labụ l'ụkporo madzụ ugbo iri a-dashị l'iku ẹke ịino; ụnukurunu anwụshihu ngu l'ụzo ẹka-ụtara. Ọle ẹ t'ọ dụdu ọphu uphere iya e-ru ngu l'ẹhu. 
Ndu akirishi; bẹ ii-gudeje ẹnya ngu ele l'ẹke aahụ̀ ẹphe àhụ̀hù. 
Keshinu ọphu ị nọwa Ọkaribe-Kakọta-Nụ l'ẹka; mbụ Ojejoje ọphu bụ a -gbabe; a dzụru nke mu 
b'ẹ tọ dụkwa iphe eme ngu nụ; ọphu ọ dụdu iphe a-bya t'ọ bya akpakaaru ngu ufu; 
kẹle Ojejoje e-zi ụnwu ojozi-imigwe iya t'ẹphe l'eche ngu nche; l'iphe bụ ẹke, iishi. 
Ẹphe e-gbobe ẹka; wọta ngu t'ụkfu ba dụ ngu. 
Agụ; mẹ oghu; bẹ ịi-dzọpyabeje l'ọkpa; mbụ gude ọkpa dzọ-gbua oke agụ; mẹ ẹjo-agwọ. 
Ojejoje sụru: “L'iphe bụ onye yeru iya obu; bẹ ya a-nọdu anafụtaje. Ya a-nọdu egbochita iya t'ẹ b'ọ dụ iphe e-me iya nụ; kẹ l'ọ gụberu ẹpha yẹbe Ojejoje iphe. 
Teke onye ono kuru iya; bẹ ya a-za iya. Ọ -nọdu l'iphe-ẹhuka; bẹ ya e-swiru iya eswiru. Ya a-nafụta iya; kwabẹ iya ugvu. 
Ya e-me t'ọ kaa nka lịlihu alịlihu; gude koshi iya lẹ ya adzọje madzụ.” 
