﻿Egvu-Ọma.
85.
Egvu-ọma, e deru nụ onye ishi egvu t'ụnwu Kora gụa I koshiru l'alị ngu nọ ngu l'obu nggụbe Ojejoje; bya emee t'iphe dụru ndibe Jékọpu lẹ mma ọdo. 
Ẹjo iphe ndibe ngu meshiru; b'ị gụkotaru ẹphe nvụ; bya eworu iphe kpube l'iphe dụ ẹji, ẹphe meshiru l'ọ ha. 
Ị chịkowaru oke ẹhu-eghughu ngu l'ọ ha gwọbe; pakọtaru ẹhu-eghughu ono, ata kfukfukfu ono haa. 
Dophunu ayi azụ l'ọnodu ayi; nggụbe Nchileke, bụ onye ndzọfuta ayi; nggu achịru iphe bụ iphe eghu ngu nụ l'ẹke ayi nọ wụshi! 
Iphe ayi meru; ?l'oo-ghuwa ngu rụ eghughu gbururu jeye tọo. Mbụ; ?ịi-hawarụ ẹhu-eghughu ngu ono t'o shi l'ọgbo sweru ọgbo. 
?T'ii mehedu t'ayi jakerehu ọdo tọo; k'ọphu ẹhu a-nọdu atsọshi ndibe ngu ẹna l'ẹke i nọ? 
Koshinu ayi ẹge i yeberu ayi obu; nggụbe Ojejoje. Dzọfutanu ayi. 
Mu a-ngabẹ nchi nụa iphe Nchileke, bụ Ojejoje ekfu. L'o kweru ụkwa lẹ ya e-me t'ẹhu dụ ndibe iya agu; mbụ ndu, dụru iya lẹ nsọ. Obenu l'iphe ẹphe a-kwabẹ ẹnya bụ t'ẹphe ba alaphuhe azụ l'ome eswe ọdo. 
Iphe doru ẹnya bụ lẹ ndu atsụ Ojejoje egvu; bẹ ọobyaakwa adzọfuta; k'ọphu o-gbu-nwịi-nwịi ya a-bya l'alị ayi ọdo. 
N-yemobu yẹle ire-lanụ a-gba onwẹphe ndzuta. Odobe-ẹka-ndoo yẹle nchị-ọdu-ndoo anmaa onwẹphe akpa. 
Ire-lanụ e-shi l'alị mifutatsua. Odobe-ẹka-ndoo eshi l'imeli pyofu ẹnya l'ele mgboko. 
Ojejoje bụ iphe dụ mma; bẹ ọo-nụduje anụ madzụ; bya emee t'iphe ayi meberu l'alị ayi mehu emehu. 
Odobe-ẹka-ndoo e-vutajeru iya ụzo; je akpaziaru iya ẹke, ọo-nọdu aha ọkpa eshi. 
