﻿Egvu-Ọma.
76.
Egvu-ọma, Ásafu deru nụ onye ishi egvu; t'a kpọru une ye iya A maru Nchileke amaru lẹ Júda. Ẹpha iya ede ude lẹ Ízurẹlu. 
Ẹke ụlo iya nọ bụ lẹ Salemu. Ẹke o bu ebubu abụru lẹ Ugvu Záyọnu. 
Ọ bụ l'ẹke ono b'ọ nyajishiru akfụ, enwu ọku, ndu ọhogu iya agba; nyakwoshia ogu-mbeke ẹphe; mẹ iphe ẹphe egbobeje gude zeeru onwẹphe; mẹ iphe bụ iphe ẹphe egudeje alụ ọgu. 
Ị dụ biribiri; dụ ugvu l'iishi l'ugvu ugvu, ẹke i mekputaru ndu ọhogu ngu alata! 
Ndu ọphu bụ mkparawa l'ime ẹphe b'e gworu iphe ẹphe tụtua atụtu. Ẹphe nwụshihuru; tọ dụ ẹphe m'ọo onye lanụ, ike dụ k'ome ụkporo. 
Nggụbe Nchileke kẹ Jékọpu; ọ bụkwadua m̀bà b'ị baru ẹphe; ịnya ẹphe; mẹ ndu agba iya nụ l'ẹphe ha adashịa. 
Ọ bụ nggu nwẹnkinyi ngu b'ọ gbaru t'a tsụje egvu. ?Bụ onye a-dụ ike vudo ngu l'ifu; mẹ ẹhu wata ngu oghu eghughu? 
Nggụbe Nchileke; teke i shi l'imigwe t'i kpee ikpe; dzọfuta ndu aakpa ẹhu lẹ mgboko; b'ị nọ l'imigwe ono bua ikpe; alị atsụhu ngu egvu daa shịkongu. 
Eeshije l'oke ẹhu-eghughu ndiphe jaa ngu ajaja; kẹle ndu ọphu oke ẹhu-eghughu ngu ono haru; a-rụku ngu ẹka. 
Ọ -bụru l'unu riburu Ojejoje, bụ Nchileke unu l'ọwaa iphe unu e-meru iya; unu mekwaa iphe ono, unu kweru ụkwa iya. T'iphe bụ ndu, bunyabe unu byakwa bya emeeru onye lanụ ono, gbaru t'a tsụje iya egvu ono iphe-ọma. 
Oomeje t'obu rua ndu ishi, achị nụ alị. Ndu, bụ eze lẹ mgboko-a l'atsụ iya egvu. 
