﻿Egvu-Ọma.
75.
Egvu-ọma, Ásafu deru nụ onye ishi egvu; ishi egvu iya bụ “Be ekwekwa tẹ ya laa l'iyi” Ayi ekele ngu ekele; nggụbe Nchileke. Ayi ekele ngu ekele. Ndu eku ẹpha ngu atụ ọnu iphe dụ biribiri, iimeje. 
Ọ bụ nggụbe Nchileke bẹ sụru: “L'i dobewaru teke ii-kpe ikpe; kpee ikpe, dụ mma. 
Teke mgboko; mẹ iphe bụ ndu bu iya nụ anma jijiji; bụ nggụbedua egudeje itso iya ẹka gudeshia ya ike. 
Ndu eku onwẹphe ekuku b'ị sụru t'ẹphe haa oku onwẹphe. Ndu akirishi b'i sụru t'ẹphe haa ọnyaru onwẹphe ndụ. 
Unu hajẹe ọnyaru Nchileke ndụ. Unu ahaa ọsa kpaakpaa.” 
Egbeshi madzụ te shidu l'ụzo ẹnyanwu-ahata; to shi l'ụzo ẹnyanwu-arịba; ọphu o shikwanu l'ụzo echi-ẹgu. 
Ọ bụ Nchileke bụ onye ekpeje ikpe; bụru iya anmajẹ madzụ ikpe; bụru iya ekpefuje ndu ọdo. 
Ọ bụ Ojejoje; bẹ okoro nọ l'ẹka. Iphe jiru okoro ono abụru mẹe, etsu ụphu. Ẹ to nwedu iphe ẹ te eyedu iya; gude mee ya t'o shihu ike. Yọ bụje; ọ nọnyaa; yọ gbashịa ya. Iphe bụ ndu akirishi lẹ mgboko-a angụa ya jeye teke ẹphe a-ngụ ngụa ọhu iya. 
Obenu lẹ mbẹdua a-nọdu ete ẹswa gbururu jeye. Mu a-nọdulephu agụ egvu l'aja Nchileke kẹ Jékọpu. 
Ndu akirishi; bẹ mu a-nafụ ike ono, ẹphe nweru ono; mee tẹ ike kẹ ndu doberu ẹka ndoo ka. 
