﻿Egvu-Ọma.
69.
Egvu, Dévidi deru nụ onye ishi egvu; t'e gude olu egvu “Okfukfulike” gụa ya Dzọo mu nggụbe Nchileke; kẹle mini wọwaru mu l'ẹkpiri. 
Mu alawa rerireri l'ime ẹpoto; ẹke ẹ tọ dụdu iphe ọkobe nvọ, nọ iya nụ. Mu daruwaru ọhu-alị; utso eriwa mu eriri. 
Mu chiwaru mkpu; ike agvụ mu; ẹkpiri agọwa mu agọgo. Mu lenyawaru ẹnya elewaa inyoki-inyoki; l'ẹke mu ele ẹnya Nchileke mu. 
Ndu mu dụ ashị l'ẹ b'ọ dụ iphe mu meru ẹphe kakwa ẹgbushi, nọ mu l'ishi. Ndu ọhogu mu adụ l'igwe; mbụ ndu iphe ẹphe shiberu ite iya; bụ ẹge ee-shi tẹ mu ba abọhe; l'ẹ b'ọ dụ iphe mu meru ẹphe. Ẹphe ekebutaje mu; tẹ mu kfụa ụgwo iphe mu te ezitadu. 
Nggụbe Nchileke; i mawaru ẹge mu emebe eswe: Ẹ t'ọ dụdu ẹke mu mesweru, ẹ-ta adabuduru ngu ẹba l'ifu. 
Nggụbe Nchileke, bụ Ọkaribe-Kakọta-Ike; be ekwekwa t'e gude okfu ẹhu mu mee ndu chịru ụkfu kwẹe ngu iphe-iphere! Ọphu i kwekwa t'e gude okfu ẹhu mu mechia ndu achọ ngu nụ ifu; nggụbe Nchileke kẹ Ízurẹlu! 
Kẹ l'ọ bụ okfu ẹhu ngu; b'e gude ekfuru mu kulakula; iphere eji mu ifu. 
Ndibe ayi dobewaru mu l'ọ bụ onye byaru abyabya. Unwunne mu phẹ egbe gụbe-wa mu nụ onye ọhodo; 
kẹ l'obu, mu yeru ụlo ngu evukwa mu ọku l'ẹhu. Iphe bụ iphe-iphere, e meru kpua ngu abụru mu vutaru ọnwu iya. 
Teke mu raru ẹkwa; swịa aswịswi; igboma egude iya jaa mu ewena. 
Mu -yee uwe-aphụ; ẹphe egude mu tụlahaa ntụ-okfu. 
Mu bụ-wa iphe ndu dzukoberu l'obu-edukfu gude akọ ọnu; bụru iphe ndu mẹe eme l'ẹnya gude agụ egvu. 
Ọlobu nggụbe Ojejoje; bẹ mu a-nọdu ekfu anụ. Gudenu n-yemobu ngu nụa olu mu teke dụ ngu mma; nggụbe Nchileke; nggu adzọo mu ẹge i kwehawaru mu ụkwa iya. 
Lọfutanu mu l'ẹpoto ono; be ekwekwa t'o ria mu! Nafụtanu mu l'ẹka ndu mu dụ ashị; gụfuta mu l'echi ebo ono! 
Be ekwekwa t'utso ria mu. Be ekwekwa t'ebo ono ria mu; ọphu i kwekwa t'e kpochia mu ẹja lẹ ndzụ! 
Zanụ mu oku; nggụbe Ojejoje; kẹle n-yemobu ngu dụ mma. Gudenu k'obu-imiko ngu; ghaaru mu ifu. 
Ba aghakwaru mụbe onye ejeru ngu ozi azụ. Zanụa mu oku ẹgwegwa; kẹle mu nọokwa l'iphe-ẹhuka. 
Kpịritanu ntse bya adzọo mu! Gbafụta mu rụ mẹ l'ọgvu ndu mu l'ẹphe nọ l'okfu! 
Ị mawaru ẹge ẹphe chị-beru mu ọchi; bya amakwarụphu ẹge ẹphe meberu mu iphe-iphere. Ndu bụ ọhogu mu b'ị makọtanuru-a. 
E meekwaru mu iphe-iphere; k'ọphu ẹhu anyịhuwa mu nkọ. Nta-a b'o mewaru mu; ike agvụ mu. Mu lewaru ẹnya onye imiko mu a-dụ; to nwe. Mu abya elee ẹnya onye a-dụ mu ike; to nwe. 
Nri, ẹphe doberu mu; bẹ ẹphe yeru mu nshi; bya edoberu mu mẹe, shihuru ụka tẹ mu ngụru ye iya. 
Tẹ nri, ẹphe doberu k'eriri; ghọkwaa ọnya-ekobe; hata ẹphe; anụ, ẹphe gburu k'ọgwa Nchileke abụru ọnya; nmata ẹphe. 
Tẹ ẹnya kpukwaa ẹphe ìshì. Tẹ ekwebe nyajikwaa ẹphe ẹbo; gbururu jeyewaru. 
Tukoshinu ẹphe ẹhu-eghughu ngu; nggu egude oke ẹhu-eghughu ngu kee ẹphe l'ọ bụ ọku! 
Tẹ ufu ẹphe bụkwaru ochobo; ọphu ọ dụkwa onye e-bu l'ụlo ẹphe. 
Kẹle ndu ẹphe akpa ẹhu; bụ ndu i chiwaru ẹchachi; bụru ndu i meshiru iphe ike; bẹ ẹphe anọduje ekfubyishi ekfubyishi. 
Dokoberu ẹphe ẹjo iphe, ẹphe meshiru edokobe. Ọphu i kwekwa t'ẹphe keta oke l'odobe-ẹka-ndoo nke ngu. 
Te fufukwa ẹpha ẹphe l'ẹkwo, e deru ẹpha ndu nọ ndzụ. Ọphu i dekwa ẹpha ẹphe l'ẹke e deru ẹpha ndu doberu ẹka ndoo. 
Ẹhu ahụakwa mu ọku; ụzo echiwa mu. Nggụbe Nchileke; tẹ ndzọta nke ngu kwakọbenu mu. 
Teke ono; mu agụa egvu gude jaa Nchileke ajaja; gude egvu-ekele mee ẹpha iya t'o dee ude. 
Onanu a-kakwa Nchileke ọtso ẹna; karia l'a kpụtaru iya eswi; mbụ oke-eswi, mpo iya hagbaa kẹ gbagara-gbagara; ụpyi-ọkpa iya epheshitsua ya epheshi. 
Ndu, aakpa ẹhu -phụle iya phụ; ẹhu atsọo ẹphe ẹna. Ndu achọ Nchileke; bẹ ọo-dụ ike! 
Ojejoje anụje olu ndu, ẹ te nwedu ẹge ọ haru ẹphe; ọphu ọ gbakutajedu ndu nk'iya, a tụru mkpọro azụ. 
Tẹ ndu bu l'imigwe yẹle ndu bu lẹ mgboko jaa ya ajaja! T'ẹnyimu yẹle iphe bu l'ime iya tụkokwaphu jaaa ya ajaja; 
kẹle Nchileke a-dzọfuta Záyọnu; kpụkwa-zikota mkpụkpu, nọ lẹ Júda. Ndiphe a-la iya je eburu; mee ya; yọ bụru iphe ẹphe. 
Ụnwu ndu ejeru iya ozi e-me iya; yọ bụru òkè-iphe ẹphe. Iphe bụ ndu yeru ẹpha iya obu e-buru l'alị ono. 
