﻿Egvu-Ọma.
65.
Egvu-ọma, Dévidi deru nụ onye ishi egvu Nggụbe Nchileke; ọ dụ mma t'ayi nọdu lẹ Záyọnu jaa ngu ajaja! Ayi e-medzukotaru ngu iphe ayi riburu l'ayi e-meru ngu. 
Nggụbe onye, anụje ekfukfu, ayi ekfu anụ ngu; ọ bụ nggu bẹ madzụ kpoo-gbaa; a-wụru wụ-kfuta. 
Teke iphe dụ ẹji ayi shi kpapyabẹ ayi; bẹ ịiguleru-a ayi nvụ. 
Ọnu-ọma bụ kẹ ndu, ị fọtaru; tẹ nggu l'ẹphe buru l'ogbodufu ngu. Iphe dụ mma, nọ l'ẹke i bu; ejije ayi ẹpho; mbụ iphe dụ mma, nọ l'eze-ụlo ngu ono, dụ nsọ ono. 
Nggụbe Nchileke; ọ bụ nggu adzọje ayi. Iigudeje iphe dụ biribiri, ekoshi l'ị bụ onye doberu ẹka ndoo zaa ayi oku. Ndu bu l'ẹke igwe jeberu; alị ejebe; mẹ ndu, bu lẹ mgboro eze ẹnyimu, kakọta ote-ẹnya; bẹ bụ nggu; bẹ ẹphe chịru ụkfu kwẹe; 
mbụ nggụbe onye bụ ike ngu; b'i gude gvubetsua ugvu l'ẹke ẹphe gvutsuaru. I keru onwongu agburu-ẹhu ẹge eekeje akpọ-buleti l'ukfu. 
Iimeje tẹ ekiri eyii-mini eze ẹnyimu tụ-buhu; l'emeje tẹ oke phẹrephere, tso iya nụ kfụshi. Utsu, etsu l'iphe bụ mbakeshi; bẹ iimeje t'o tsubuhu. 
Ndu bu ote-ẹnya; anọduje anma kwẹkwekwe; mẹ ẹphe nụa k'iphe, dụ biribiri, iimetsua. Iphe iimeshi emeshi; bẹ ndiphe lẹ mgboko gbaa mgburumgburu gude ẹhu-ọtso-ẹna agụru ngu egvu. 
Ịigbaje mini lẹ mgboko-a teke ị byaru iya agbaphe; shi ẹge ono mee ya; yọ bụru alị-ọsa. Ẹnyimu nke ngu b'i meru tẹ mini ji ejiji. I meru t'iphe, ndiphe meberu l'alị mehu; kẹ l'ọ bụ ẹge ono; b'i meru iya t'ọ dụ. 
Ị chịru mini; yọ dọru adọru l'ẹnyoro. Nggu abya ayọo tẹshiteshi gude mee igbo; t'ọ dụ ruharuha; shi ẹge ono gọru ọnu-ọma nụ iya; mee iphe e meberu iya; t'o vua evuvu. 
I wotaru o-me-l'uko nke ngu ye l'iphe e meberu emebe. Iphe bụ ẹke, i shiru; b'ẹ ta achọjedu nri achọcho. 
Ẹgbudu abya efuchia echi-ẹgu; ẹhu awata ọtso iphe, bụ ugvu ugvu ẹna. 
Ẹgu ẹke eecheje iphe-edobe; bẹ atụru kụru l'ata nri. A bya lẹ nsụda nsụda; iphe jiru iya nụ abụru iphe a kọberu akọbe. Iphemiphe ọbule ono chịkoru atụ ụzu; l'agụ egvu ẹhu-ọtso-ẹna. 
