﻿Egvu-Ọma.
59.
Egvu-ọma, Dévidi deru nụ onye ishi egvu; ishi egvu iya bụ “Be emekwa tẹ ya laa l'iyi” Teke ọ gụru iya bụ teke Sọlu yeru ndu madzụ t'ẹphe je ngge l'ụlo, ọ nọ; shi ẹge ono gbua ya Nafụtanu mu l'ẹka ndu ọhogu mu; nggụbe Nchileke mu! Dzọnua mu l'ẹka ndu wụ-lihuru wụpyabe mu! 
Nafụtanu mu l'ẹka ndu ẹjo madzụ; nggu adzọo mu l'ẹka ndu mgbugbu-madzụ! 
Nggụbe Ojejoje; lewaru ẹge ẹphe domishiru onwẹphe; kwabẹ t'ẹphe mee mu iphe. Ndu oke-apịtipa wụ-lihuru l'achịru mu ẹjo idzu; lẹ mu ba achọ ẹphe okfu; l'ẹ b'ọ dụ ẹjo iphe, mu meru. 
Ẹphe jịkoberu onwẹphe t'ẹphe tso mu ọgu; l'ẹ b'ọ dụ iphe mu meru ẹphe. Gbeshinu; bya agbaaru mu mkpu! Lewaru ẹnya; phụ ẹge ọnodu mu dụ! 
Nggụbe Ojejoje; nggụbe Nchileke, bụ Ọkaribe-Kakọta-Ike; nggụbe Nchileke kẹ ndu Ízurẹlu; gbeshinu je ahụa iphe bụ mbakeshi ahụ̀hú! Ba adụkwa ẹphe onye ịi-phụru imiko; mbụ ndu akirishi ono, akwabẹje ẹnya eme iphe a-tsụru ibe ẹphe ono! 
Ọobuje; ẹphe -lata l'urẹnyashi; ẹphe epyophelahaa l'ọ bụ nkụta; tsoru mkpụkpu l'aghaphe. 
Nụwaru egbe iphe shi ẹphe l'ọnu. Ire ẹphe dụ l'ọ bụ ogu-mbeke; ẹphe etubesu l'ẹ tọ dụdu onye nụru iphe ẹphe ekfu. 
Obenu l'ọ bụ ọchi; bẹ nggụbe Ojejoje achịje ẹphe. Ọ bụ ọchi; bẹ ịichije iphe bụ mbakeshi ono l'ẹphe ha. 
Nggụbe Nchileke; ọ bụ nggu bụ ike mu. Mu chịru ẹnya dobe l'ẹke ị nọ. Ọ bụ nggụbedua bụ a-gbabe-a-dzụru. 
Nchileke, bụ onye yeru mu obu e-vutaru mu ụzo. Nchileke e-kwee tẹ mu gude ẹnya mu phụ lẹ ndu achị mu nụ; bẹ ishi kpuru l'alị. 
Be egbukwa ẹphe egbugbu; nggụbe Ojejoje, bụ onye egbochitaje ayi; ọdumeka bẹ ndibe ayi a-zahakwa iya. Gbe gudechia ike ngu; mee t'ẹphe jelehaa mbalogo-mbalogo; nggu eshi ẹge ono lọ-tsuta ẹphe! 
Tẹ ekuku ono, ẹphe anọduje eku onwẹphe ono bụkwaru ọnya nmata ẹphe. Iphe shi ẹphe l'ọnu abụkotaje ẹjo okfu; bụru ẹjo iphe. Okfu l'ẹphe egudeje ọnu ẹphe adzụ ejiru; gude iya atụ ibe ẹphe ọnu; 
gudenu oke ẹhu-eghughu ngu kee ẹphe l'ọ bụ ọku! Kee ẹphe ọku ono jeye teke ẹphe a-gvụ; Teke ono; ndiphe agbaa mgburumgburu; maru l'ọ bụ Nchileke bụ Eze, achị ndu Ízurẹlu; maru l'ọ bụ eze l'ẹkemeke ọbule lẹ mgboko. 
Ọobuje; ẹphe -lata l'urẹnyashi; ẹphe etsoru mkpụkpu; pyophelahaa l'ọ bụ nkụta. 
Ẹphe anọduje awuphe; achọ ẹke ẹphe e-ri nri. Ọ -bụru l'ẹphe te rijidu ẹpho; ẹphe abalahaa korokoro. 
Obenu lẹ mbẹdua a-gụ egvu gude tụa ọnu ẹge ike ngu habe nshinu. Ụtsu mbọku-mbọku; bẹ mu a-nọdu agụ egvu; gude ekoshi ẹge n-yemobu ngu habe nshinu; kẹ l'ọ bụ nggụbedua bụ a-gbabe-a-dzụru nke mu; bụru l'ime ngu; bẹ mu agbabajẹ; zeeru ndzụ teke mu nọ l'iphe-ẹhuka. 
Nggụbe ike, nọ mu nụ; mu a-gụ egvu gude kele ngu. Ọ bụ nggụbe Nchileke; bụ a-gbabe-a-dzụru nke mu; mbụ Nchileke, bụ onye yeru mu obu. 
