﻿Egvu-Ọma.
58.
Egvu-ọma, Dévidi deru nụ onye ishi egvu; ishi egvu iya bụ “Be emekwa tẹ ya laa l'iyi” Unubẹ ndu ọgbo ikpe; ?ọ nwekpooru teke okfu, dụ mma eshije unu l'ọnu lụfuta? ?Tọ bụdu ẹjo ikpe; bẹ unu ekpeje ụnwu eliphe. 
Wawakwa! Iphe anọje unu l'ọriri bụlephu ẹge unu e-shi mee ẹjo iphe. Ọ bụ iphe-kpaa; bẹ unu wolataru ndiphe. 
Ndu akirishi eshije teke ẹphe nọ l'ẹpho nne ẹphe bụtaru o-kweru-ike. Ẹphe eshije l'ẹpho oshiswe ụzo; ẹjo-ire eshi ẹphe lẹ dẹdede. 
Ẹra, ẹphe atajẹ dụ l'ọ bụ ẹra ẹjo agwọ. Ẹphe swọ-chishiru nchị; l'ada nkịchi l'ọ bụ oghu; 
mbụ oghu, ẹ ta anụjedu opu, onye raru iya ẹka l'ifu egbu; gude ekfuru iya okfu; m'o -ruhuru; o gbua opu ọphu igbu-agha. 
Kpaa ẹphe eze, nọ ẹphe l'ọnu; nggụbe Nchileke! Nggụbe Ojejoje; swọshinua ẹpyi, nọ agụ ono l'ọnu! 
T'ẹphe wụfukwa l'ọ bụ mini, atsọ atsọtso. Teke ẹphe setaru ụta ẹphe k'agbagba; mekwaa tẹ akfụ ẹphe kweru dụngu. 
T'ẹphe dụ l'ọ bụ ẹji, gbazehuru agbazehu. T'ẹphe be egudekwa ẹnya ẹphe phụa ẹnyanwu l'ọ bụ nwata, nwụhuru nne iya l'ẹpho. 
K'ọphu bụ; l'ẹswa, e shiberu ite -bya emeta ọku; ngaa ite ono; bẹ Nchileke gudewa oke ẹhu-eghughu iya wofukebe ite ono l'ọ bụ oke phẹrephere; m'o -ruhuru; iphe e shiberu l'ite ono dụkwadu onyingu-onyingu; m'ọ bụ l'ọobyawa eghehu. 
Ndu doberu ẹka ndoo; bẹ ẹhu a-nọdu atsọ ẹna; mẹ ẹphe -phụlephu lẹ Nchileke akfụwa ndu ẹjo iya ono ụgwo ẹjo iphe, ẹphe meru; m'e gbudelephu ndu ẹjo iya ono pyaapyaa. 
Teke ono bẹ ndiphe e-kfulahaa; sụ: “L'ọ kwa oswi-okfu lẹ ndu doberu ẹka ndoo; bẹ obunggo nọru! Mbụ l'ọ kwa ire-lanụ l'o nweru Nchileke, ekpeje eliphe-a ikpe!” 
