﻿Egvu-Ọma.
54.
Ẹ́vù, Dévidi raru nụ onye ishi egvu. T'a kpọru une ye iya Teke ọ raru ẹ̀vù ono bụ lẹ ndu Zifu jeru je asụ Sọlu lẹ Dévidi domikwaru onwiya l'alị ẹphe Gudenu ike ngu dzọfuta mu; nggụbe Nchileke; nggu egude ọkpehu ngu haaru mu enge! 
Nụnua ekfukfu, mu ekfu anụ ngu; nggụbe Nchileke. Ngabẹnu nchị; nụa iphe shi mu ọnu. 
Kẹle ndu shi eshishi wụru bya mu otso ọgu; ndu ẹjo ọkpoma l'achọ t'ẹphe wofu mu; mbụ ndu ẹ ta adụdu iphe ẹphe gụberu Nchileke. 
Obenu l'ọ bụ Nchileke bụ onye eyejeru mu ẹka. Ọ bụ Nnajiufu; bụ iya gude ndzụ mu. 
Tẹ Nchileke mekwaa tẹ ẹjo iphe ndu ọhogu mu meru mu laphuru ẹphe azụ! Tẹ Nchileke mekwaa t'ẹphe bụru kpurupyata; shi ẹge ono koshi lẹ ya bụ o-me-g'o-kfuru. 
Mu e-gude ẹhu-ọtso-ẹna gwotaru ngu ngwẹja. Mu abya etua ngu ẹpha; nggụbe Ojejoje; kẹ l'ị dụ mma. 
Ọ bụ nggu dzọfutaru mu l'iphe bụ iphe-ẹhuka, byakfutaru mu nụ. Mu egudewa ẹnya mu phụ l'e mekputawaru ndu ọhogu mu phẹ. 
