﻿Egvu-Ọma.
47.
Egvu, e deru nụ onye ishi egvu tẹ Ụnwu Kora gụa Unu kụa ẹka; unubẹ ndiphe! Unu gude ẹhu-ọtso-ẹna chiaru Nchileke mgbe-egvu! 
Ishi iya abụru lẹ Ojejoje, bụ Ọkaribe-Kakọta-Nụ dụ biribiri; bụru iya bụ eze lẹ mgboko mgburumgburu. 
O wotawaru iphe bụ mbakeshi ye ayi l'ẹka. 
Ọ bụ yẹbedua fọtaru ayi alị, ayi bu; mbụ alị ono, Jékọpu, bụ onye Nchileke yeru obu egudeje eku onwiya ono. 
Nchileke ejewa l'aba-eze iya. Eechiwaru iya mkpu ẹhu-ọtso-ẹna; l'egburu iya ụpyoku. 
Unu gụa egvu gude kele Nchileke ekele! Unu gụaru iya egvu ekele! Unu gụa egvu gude kele eze ayi! Unu gụaru iya egvu ekele! 
Kẹ l'ọ bụ Nchileke bụ eze lẹ mgboko gbaa mgburumgburu. Unu raa ẹ́vù gude jaa ya ajaja! 
Ọ bụ Nchileke bụ eze iphe bụ mbakeshi. Ọ nọ l'aba-eze iya, dụ nsọ. 
Ndu nweru ẹnya lẹ mgboko dzukobekwaru l'ọ bụ ndibe Nchileke kẹ Ébirihamu; kẹle ndu eze, achị mgboko-a bụkwa Nchileke nwe ẹphe. Ọ kwa Nchileke; bẹ kangokotaru nụ. 
