﻿Egvu-Ọma.
46.
Egvu, e deru nụ onye ishi egvu tẹ Ụnwu Kora gude olu ụnwu-mgbọko gụa ya Ọ bụ Nchileke bẹ bụ onye ayi nọ l'ẹka ezeru ndzụ; bụru iya bụ ike ayi. Ooswijeru ayi eswiru l'eyeru ayi ẹka teke ayi eje iphe-ẹhuka. 
K'ọphu bụ l'ayi ta atsụdu egvu; m'o -ruhuru; mgboko dakashịhu; ugvu adalashịhu l'eze ẹnyimu; 
mini, nọ l'eze ẹnyimu byalahaa kulakula; k'ọphu bụ l'ugvu ugvu wataru ọnma jijiji; bẹ ayi ta atsụdu egvu lẹ phuu. 
O nweru ẹnyimu ọphu nọnu. Mini, shi iya nụ emeje t'ẹhu tsọ mkpụkpu kẹ Nchileke ẹna; mbụ ẹke dụ nsọ, Ọkaribe-Kakọta-Nụ bu. 
Nchileke nọkwa lẹ mkpụkpu ono; k'ọphu bụ l'ẹ t'ọ dụdu iphe eme iya nụ. Nchi -bya abọhu; bẹ Nchileke agbawaru iya mkpu. 
Iphe bụ mbakeshi etsu ẹka l'ọkpoma. Nchileke ewolia olu; raaru ẹphe ọra; alị-eze ẹphe adakashịhu; mgboko l'onwiya erushihu. 
Ojejoje, bụ Ọkaribe-Kakọta-Ike; bẹ nọkwa swiru ayi. Ọ kwa Nchileke kẹ Jékọpu bụ a-gbabe-a-dzụru nk'ayi. 
Byanụ bya aphụ iphe Ojejoje meru. Byanụ bya aphụ ẹge o meru mgboko; yọ bụru kpurupyata! 
Oomeje tẹ ndiphe haa ọlu ọgu. Ọogba-jishije akfụ; mebyishia arwa; kpọkota ụgbo-ịnya ọku. 
Ọ sụru: “Unu nọdu nwandoo; maru l'ọ bụ yẹbedua bụ Nchileke. Iphe bụ mbakeshi a-tụ ọnu yẹbe Nchileke lẹ mgboko gbaa mgburumgburu lẹ ya ha nshinu.” 
Ojejoje, bụ Ọkaribe-Kakọta-Ike bẹ nọkwa swiru ayi. Ọ kwa Nchileke kẹ Jékọpu bụ a-gbabe-a-dzụru nk'ayi. 
