﻿Egvu-Ọma.
39.
Egvu-ọma, Dévidi deru nụ onye ishi egvu, bụ Jedutunu Mu sụru lẹ mu a-kwachafụru onwomu ẹnya; tẹ mu be egude ọnu mu kfuta iphe dụ ẹji. Mu a-tụje ọnu mu eri teke mu lẹ ndu akirishi nọ. 
Teke mu daru ashị; t'ẹ b'ọ dụ iphe mu e-je ekfukfu; m'o -ruhuru; ọ bụru iphe dụ mma; teke ono; bẹ iphe-ẹhuka mu gbe bya aka nshinu. 
A nọnyaa; obu agbajahulehaa mu agbajahu. Mu arịnyale iya phụ; to kwehe; mu asanụa ọnu wata okfu okfu; sụ: 
“Nggụbe Ojejoje; menua tẹ mu maru ẹge mu a-nọ-bebe. Koshi nụ mu oge nka-ezekuna nke mu; mbụ ẹge ọo-habe; mu achịri ọwa wụshi. 
I meru ndzụ mu; yọ gbaa sụ-kworongu. Ẹge mu kataberu nka te nwekwa iphe ọ bụ l'ẹke ị nọ. Ndzụ madzụ dụlekwaphu l'ọ bụ uphere-ọnu. 
Madzụ bụ nwonyonyo mmanu b'ọ bụ. Gbirigbiri ono, aanọduje ada ono bụlephu t'ọ bụru. Ọokpaje ẹku dobe; tọ ma onye e-ri ya nụ. 
Nta-a Ojejoje; ?bụkpo ngụnu; bẹ mu ele ẹnya iya? Ọ bụ nggu; bẹ mu dakoberu. 
Nafụta mu l'emeswe ono, mu mesweru ngu ono! Be ekwekwa tẹ ndu eme eswe kweeru mu une! 
Mu shi kpọo ẹka l'agba nọ-kirishia; kẹ l'ọ bụ nggu; bẹ iphe ono, amụkotaru mu nụ ono shi l'ẹka. 
Ba ahụ̀he nụ mu àhụ̀hù-a, ịihụ̀ mu-a; kẹ l'ike agvụakwa mu l'iphe iime mu. 
Ịibajeru madzụ mba; hụ̀a ya àhụ̀hù kẹ iphe dụ ẹji, oome;. Ịitakashije iphe dụ mma onye ono nweru l'ọ bụ ẹka-mkpu. Onyemonye ọbule; bẹ ndzụ iya dụlephu l'ọ bụ uphere-ọnu. 
Nụnua ekfukfu, mu ekfu anụ ngu nggụbe Ojejoje! Ngabẹnu nchị lẹ mkpu, mu echiku ngu! Ba adahụkwa mu nkịchi l'ẹkwa, mu ara araku ngu; kẹle mu bụ onye ije lakfuta ngu; l'ọ bụ ndiche ayi phẹ. 
Byiko ha mu rụ; k'ọphu mu a-kabẹ nweru nwa ẹhu-ọtso-ẹna m'ọo ujiku lanụ; tẹmanu mu anwụhude.” 
