﻿Egvu-Ọma.
35.
Egvu, Dévidi deru Nggụbe Ojejoje; tso ndu etso mu okfu okfu! Tsokwaphu ndu etso mu ọgu ọgu! 
Gwota nụ ngwa-ọgu ngu; mẹ iphe eegudeje egbochita onwonye l'ọgu; gude bya agbaaru mu mkpu! 
Palia arwa ngu; mẹ akfụ ngu gude kfụ-chia ndu achị mu nụ ụzo! Kfunuru mu l'ịi-dzọfuta mu! 
T'iphere bụkwaru kẹ ndu achọ ụzo, ẹphe e-shi gbua mu. T'a chiphukwa ẹphe azụ; mbụ ndu achịru mu ẹjo idzu. Tẹ iphe jikwa ẹphe ẹnya. 
T'ẹphe dụkwa l'ọ bụ ẹswa witu, phẹrephere zikashiru teke ojozi-imigwe Ojejoje a-nọdu achị-phu ẹphe achị-phu. 
T'ụzo ẹphe gbakwaa tsụbalangu; chikotakwaphu ẹturu teke ojozi-imigwe Ojejoje a-nọdu achị ẹphe agada-eru-alị. 
Keshinu ẹphe gbaru mu ọnya; l'ẹ b'ọ dụ iphe mu meru ẹphe; bya atụa iduma doberu mu; l'ẹ b'ọ dụ iphe mu meru; 
tẹ ọ-la-l'iyi tụkwaa ẹphe l'ụkfu. Tẹ ọnya, ẹphe gbaru hatakwa ẹphe; ẹphe adalahụ l'iduma, ẹphe tụru; bụru kpurupyata. 
Teke ono; bẹ mu e-tee ẹswa l'ime Ojejoje. Ẹhu atsọo mu ẹna k'adzọfuta, ọ dzọfutaru mu. 
Mu e-gude obu mu l'ọ ha; sụ: ?Bụ onye dụ l'ọ bụ nggụbe Ojejoje. Ọ bụ nggu adzọfutaje ndu ụkpa l'ẹka ndu ka ẹphe; nafụta ndu ụkpa; mẹ ndu ẹ te nwedu ẹge ọ haru ẹphe l'ẹka ndu ana nfụ. 
Ndu ẹjo ekebe wụ-lihuru l'ẹbo mu ibo. Ẹphe akpakọ iphe mu ta madu teke o meru bobe mu. 
Ẹphe gude iphe dụ ẹji kfụa mu ụgwo iphe-ọma; shi ẹge ono mee; ike agvụ mu. 
Obenu lẹ teke ẹhu dụru ẹphe ẹji; bẹ mu yeru uwe-aphụ; wozita onwomu alị; swịa aswịswi; kfua nụ Ojejoje. 
Mu raru ẹkwa; gụa aphụ ẹhu ẹphe; l'ẹ̀phè bụ̀ unwunne mu; m'ọ bụ ọnya mu. Mu anọduje dẹe ẹka l'agba l'ọ̀ bụ̀ onye ara ẹkwa nne iya. 
Obenu lẹ teke iphe-ẹhuka byaru mu; bẹ ẹphe gbaru mu mgburumgburu l'aja mu ewena; mbụ ndu mu ta madụ; gude ẹjo okfu asa mu ọsa ẹkfu. 
Ndu ono, ẹ ta madụ Ojejoje ono anọdu aja mu ewena; l'atagbaaru mu ikireze. 
Nggụbe Ojejoje; ?bụ teke ole bẹ ịi-chị-bebe ẹnya yeru ayi ẹge-a? Dzọnua mu; a nọnyaa; ẹphe emee mu; mu abụru ọ-la-l'iyi! Dzọfutaru mkpakọ iphe ono, mu nweru ono, bụ iya bụ ndzụ mu l'ẹka ẹjo agụ phẹ ono! 
Ọ bụ l'edzudzu ọha; bẹ mu a-nọdu kele ngu ekele; mu a-nọdu l'edzudzu ọha jaa ngu ajaja. 
Be ekwekwa tẹ ndu ọhogu mu zụaru mu ukwe; mbụ ndu ono, mu dụ ashị; l'ẹ b'ọ dụ iphe mu meru ẹphe ono. Ọphu i kwekwa tẹ ndu ono, mu dụ ashị l'ẹ ba dụ iphe mu meru ẹphe ono vọoru mu eze. 
Kẹ l'ẹphe te ekfujedu okfu nchị-ọdu-ndoo. Iphe ẹphe evutachijee l'ishi bụ okobe ndu, dụ agu l'alị-a okfu. 
Ẹphe ghecharu ọnu eghecha l'ebo mu ibo: l'azụ mgbede l'ẹphe gude ẹnya ẹphe phụa mu teke mu eme iya! 
Obenu lẹ nggụbe Ojejoje phụwaru-a iphe ono l'ọ ha. Byiko; b'e leswetakwa mu; ọphu ị nọdukwa mu ote-ẹnya! 
Tehu etehu. Zilihu bya adzọo mu! Gbaaru mu ọdzori; nggụbe Nnajiufu, bụ Nchileke mu! 
Gude odobe-ẹka-ndoo ngu haaru mu enge; nggụbe Ojejoje, bụ Nchileke mu! Be ekwekwa t'ẹphe zụaru mu ukwe! 
Be ekwekwa t'ẹphe rịa l'obu ẹphe; sụ: “Ha! Lẹ nta-a; bẹ ẹphe chọ-vuwaru iphe ẹphe achọ!” M'ọ bụ t'ẹphe sụ: “Nta-a bẹ ẹphe menwuwaru iya ẹhu!” 
Tiphere bụkwaru kẹ ndu azụru mu ukwe l'iphe, byaru mu nụ; ẹphe akpọo beru. Tẹ iphere; mẹ ewena jikwa ẹphe ifu; mbụ ndu ono, eku onwẹphe iphe ẹphe ẹ-ta ahadu l'ọ bụ iya ono! 
Tẹ ndu ele ẹnya t'a haaru mu enge gụa egvu ẹhu-atsọ-ẹna tee ẹswa! T'iphe ẹphe a-kpụjeru l'ọnu bụkwaru: “T'a tụa ọnu Ojejoje l'ọ ha nshinu; mbụ Ojejoje ono, ọoduje mma mẹ nwozi iya buru l'ẹhu-agu ono.” 
Ọo ya bụ; mu egude ọnu mu kfua k'odobe-ẹka-ndoo nke ngu. Yọ bụkwaruphu ẹge ono; bẹ mu a-nọdu etu ngu ẹpha mbọku-mbọku. 
