﻿Egvu-Ọma.
20.
Egvu-ọma, Dévidi deru nụ onye ishi egvu Tẹ Ojejoje zakwaa ngu oku teke iphe-ẹhuka byaru ngu! Tẹ Nchileke kẹ Jékọpu byiko gbochitajekwa ngu! 
T'o shikwa l'ụlo iya, dụ nsọ bya agbaaru ngu mkpu! T'o shikwa lẹ Záyọnu bya bya eyetaru ngu ẹka! 
T'ọ nyatakwa iphemiphe ọbule, i sweru ẹnya nụ iya! T'ọ natakwa ngwẹja-ukfuru, i gworu nụ iya! 
T'ọ nụkwa ngu iphe bụ uche ngu! Yo mekwaaphu t'iphe ị tụberu bụru ụpete! 
Ayi a-tụ ụzu; ẹhu atsọo ayi ẹna teke ayi nụleruphu l'i mekputawaru. Ayi achiliaru Nchileke ayi ẹkwa-ọhubama. Tẹ Ojejoje mekwaaru ngu iphe bụ iphe ị rọru iya! 
Nta-a; bẹ mu mawaru lẹ Ojejoje dzọfutawaru onye nk'iya, a wụru manụ l'ishi. Ooshije l'imigwe ono, dụ nsọ ono za iya oku. Ọ bụ ike iya; bẹ oogudeje mee tẹ ẹka onye eze ono kangoo. 
O nweru ndu achịjeru ụkfu kwẹe l'ụgbo-ịnya. Nweru ndu ọphu akpọjeru obu ye l'ịnya-ọgu ẹphe. Obenu l'ayịbedua bụ ẹpha Ojejoje, bụ Nchileke ayi bẹ ayi dakoberu. 
Ẹphe e-vukota iphe dashịa. Obenu l'ayịbedua e-gbeshi; vudoshia ike. 
Nggụbe Ojejoje; menua tẹ ẹka onye eze ayi kangoo! Nggu anụjee olu ayi teke ayi rakuru ngu! 
