﻿Egvu-Ọma.
16.
Egvu-ọma, Dévidi deru Gbochita mu nggụbe Nchileke; kẹle mu gbabawaru ngu l'ẹka tẹ mu zeeru ndzụ. 
Mu sụru Ojejoje l'ọo ya bụ Nnajiufu nke mu. Iphe bụ iphe dụ mma, mu nweru bụ Ojejoje b'o shi l'ẹka. 
A bya lẹ ndu dụru Nchileke nsọ, bu l'alị-a; ọo ẹphe bụ ndu dụ ugvu; bụru ẹphe kagee mu ọduta mma l'obu. 
Ndu, sụru l'ọ bụ iphe aagwa agwagwa bụ Nchileke ẹphe; bẹ iphe-ẹhuka ẹphe a-nọdukwa aka nshinu eje ejeje. Mee anụ, shi mu l'ẹka te erudu agwa ẹphe ono l'ọnu. T'o nwe lẹ mu egude ọnu mu ọwaa kpọ-ku agwa ẹphe ọbu. 
Ọ bụ Ojejoje bụ òkè-iphe mu; bya abụru iya bụwa mu mkpakọ-lịtoli; mbụ l'ọo nggụbe Ojejoje; bẹ iphe mu a-bụru nọ l'ẹka. 
Iphe e ketaru mu dụkpoo mma nshinu; mbụ l'òkè-iphe nke mu dụ ọkpobe mma. 
Mu a-nọduje etu Ojejoje ẹpha; mbụ onye akpọ-zijeru mu ụzo. Ọobujeru; o -be l'ẹnyashi; obu mu ezilahaa mu iphe. 
Mu anọdujelephu arị kẹ Ojejoje tekenteke. Tekenteke b'ọ nọ mu l'ẹka-ụtara; k'ọphu ẹ te enwubatadu mu enwubata. 
Ọ bụ iphe ono meru iphe ẹhu anọduje atsọ mu ẹna. Mu ete ẹswa l'ime obu; kẹ l'ẹ t'o nwedu iphe emebata mu nụ. 
Ishi iya abụru lẹ mu mawaru l'ẹ tịi hadu mu l'alị-maa; l'ẹ tịi hadu onye nke ngu, dụ nsọ t'o rehu erehu. 
Obenu l'i koshichiaru mu ụzo ndzụ. L'ifu ngu, mu anọduje tekenteke emeje t'ẹhu atsọ mu ẹna. Anọno, mu anọduje l'ẹka-ụtara ngu e-me t'ẹhu tsọo mu ẹna jeye lẹ tutu yoyo. 
