﻿Egvu-Ọma.
7.
Egvu-aphụ, Dévidi gụru nụ Ojejoje lẹ k'iphe Kúshi, bụ o-shi-l'eri Bénjaminu kfuru Nggụbe Ojejoje, bụ Nchileke mu; ọ kwa l'ime ngu bẹ mu gbabataru; tẹ mu zeeru ndzụ. Dzọnua mu; l'ẹka iphe bụ ndu achị mu nụ; byiko nafụta mu rụ! 
Ọdumeka bẹ ẹphe e-gudekwa mu l'ọ bụ agụ; labushia nanụ nanụ; l'ẹ b'o nwe onye ọdo, mu nweru a-gbaru mu mkpu. 
Nggụbe Ojejoje, bụ Nchileke mu; a gụfukwa l'o nweru iphe dụ ẹji, mu mejeru; 
mbụ l'o nweru m'ọ bụ onye okfu ẹ-ta dụduru mu l'iya, mu mejeru iphe dụ ẹji. Ọdudu bụru lẹ mu natajẹru ndu ọhogu mu iphe k'ẹhuka; l'ẹ b'ọ dụ iphe kparu iya nụ; 
ọo ya bụ; tẹ ndu ọhogu mu, achị mu nụ gude mu; dzọo mu pyakapyaka; Ẹphe ewowaruru ugvu ono, aakwabẹ mu ono gwọo lẹ ntụ. 
Nggụbe Ojejoje; gude nụ ẹhu-eghughu kwolihu! Gbeshi nụ; nọ-chia ẹphe ụzo; mbụ ndu ọhogu ono, gude ẹhu-eghughu achị mu ono. Kwolihuru Ojejoje; kẹ l'ọ kwa nggụbedua tụru ekemu; sụ tẹ ndiphe kpeje ikpe, dụ maa. 
Chịkobenu mkporo-ọha ono, dzukoberu nụ ono; t'ẹphe gbaa ngu mgburumgburu; nggu anọdu l'aba-eze ngu l'ephekerephe. 
Ọ bụ nggụbe Ojejoje e-kpe ndu ono ikpe. Kpee ya; kperu yeru mu; kẹle mu bụ onye doberu ẹka ndoo; to nwe ẹke ụta dụ mu l'ẹhu. 
Nggụbe Nchileke, bụ onye doberu ẹka ndoo; nggụbe onye enyochaje ime obu madzụ; mẹ ọriri iya; byiko menua t'ọ kfụshi; mbụ iwe-iwe ono, ndu akirishi eme ono! Mee tẹ ndu doberu ẹka ndoo ngụru angụru! 
Nchileke bụ iya egbochitaje mu nụ. Ọ bụ iya adzọfutaje ndu obu gụru iphoro. 
Nchileke bụ onye ekpeje ikpe, dụ maa; bụru onye ekoshije ndu ẹjo madzụ oke ẹhu-eghughu iya mbọku-mbọku. 
Ọ -bụru lẹ madzụ ta atadu onwiya ụta iphe dụ ẹji iya; bẹ ọo-bakwa nkogo iya tee ya nkọ; kwee ụta iya; ye iya akfụ gọberu ndu ono. 
Ọ kwakọokwaru ẹjo ngwa-ọgu iya dobe; bya edozikotawa akfụ iya, enwu ọku. 
Lewaru ẹge ẹjo iphe jiru ndu akirishi obu. Ẹjo iphe ono, jiru ẹphe obu ono abụru ẹregede. Iphe e-shi l'ẹregede ono lụfuta abụru ntuphu-ire. 
Ẹphe tụru iduma; tumia ya atumi. Obenu l'ọ bụ ẹphe e-mekochaa dalahụ l'iduma ono. 
Ẹregede, ẹphe agba e-mekochakwaa bya atukoru ẹphe l'ishi. Iphe-kpaa, ẹphe meshiru ndu ọdo a-laphukwaru ẹphe azụ. 
Mbẹdua a-nọdulephu ekele Ojejoje ekele; kẹ l'ọ bụ onye doberu ẹka ndoo. Mu agụa egvu; gude tua onye ono, bụ Ọkaribe-Kakọta-Nụ ono ẹpha. 
