﻿Egvu-Ọma.
6.
Egvu-ọma, Dévidi deru nụ onye ishi egvu; t'e gude olu, ede edede gụa ya; t'a kpọru une ye iya Nggụbe Ojejoje; be egudekwa ẹhu-eghughu baaru mu mba; ọphu i gudekwa oke ẹhu-eghughu ngu hụ̀a mu àhụ̀hù! 
Nggụbe Ojejoje; phụaru mu rụ imiko; kẹ l'ike gvụwaru mu. Nggụbe Ojejoje; menua tẹ mu ka mma; kẹ l'ẹhu mu l'ọ ha anmakọtakwa mu kwẹkwekwe. 
Meji atọfukwa mu atọfu. Nggụbe Ojejoje; ?bụ teke ngụnu meru; tẹmanu nggu agbaaru mu mkpu? 
Laphuta azụ; Ojejoje; bya bya adzọo mu! Gude kẹ n-yemobu ngu ono, bụ 'onwe agvụgvu ono dzọo mu! 
Kẹ l'onye nwụhuru nụ ta anyatahẹkwa ngu. ?Bụ onye a-nọdu l'alị-maa l'ekele ngu ekele. 
Mu tsụakwaru ude jeye ike agvụ mu. Mu -laa l'ụlo mbọku-mbọku; mu akwaa ẹkwa jeye nchi abọhu; ọphu 'onwedu mbọku, a nọjeru tẹ ẹnya-mini mu ba tsọ l'iphe mu echebeje ishi. 
Aphụ, byaru mu nụ mewaru; mu akwaa ẹkwa kwata ẹnya-ìshì. O mewaru; ẹnya ekoshia mu ekoshi. Yọ bụru iphe ndu ọhogu mu kpataru mu. 
Unu gbeshi mu l'ifu; unubẹ ndu ẹjo iya ono; kẹle Ojejoje nụwaru ẹkwa mu akwa. 
Ojejoje nụwaru arọro, mu rọru iya. Ọ nụwaru ekfukfu, mu ekfu anụ iya. 
Ndu ọhogu mu l'ẹphe ha; bẹ ee-kpu ifu lẹ ntụ; meji atọshihu ẹphe. Ẹphe a-ghakọbe; gude iphere laphushia azụ. 
