﻿Jobu.
41.
“?Ii-gudeghe ịkokoro hata ẹjo agiyi ono; ?m'ọ bụ kee ya eri l'ire. 
?Ii-yeghe iya eri l'imi lọpyia alọpyi; m'ọ bụ gude ịkokoro dzụgbabe iya agba. 
?Ọo-rọ ngu arọro t'ị haa ya tọo. ?Oo-gude-ghe olu-odoo kfuru yeru ngu. 
?Oo-kwe tẹ nggu l'iya gbaa ndzụ; t'ọ bụru ohu ngu jeye lẹ gbururu tọo. 
?Ịi-dụ ike mekoshije iya ẹge eemekoshije ụnwenu-a; ?m'ọ bụ haaru iya ụnwegirima ngu ndu k'ụnwanyi t'ẹphe l'iya gvuje egvu. 
Ndu agba nghọ; ?ẹphe e-kweghe ngu iya ọnu tọo. Ịi-dụ ike mee ya; k'ọphu ndu oke aswa e-re iya lẹ mgbuka? 
?Ịi-dụ ike gbubushia igwe ibiribe ibiribe tsụ-jia ya l'akpọ ẹhu; m'ọ bụ gude ịkekee sụ-fua ya ishi. 
I -byia ya ẹka mmanu; b'ẹ tịi tụhekwa iya ama ọdo; kẹ l'ịi-nyata-a ẹge ọ mụru nggu l'iya. 
Onye arị lẹ ya e-mekputa ẹjo agiyi kwa ẹjo-ire bẹ ọodzu; kẹ l'ọ bụkwadua t'ẹnya nggu l'iya chegba; ike agvụ ngu. 
Keshinu ẹ tọ dụdu madzụ nwigbaleke-ọma, a-dụ-ghe ike kpalia ẹjo agiyi ono; ?bụ-chia yẹbe Nchileke, bẹ madzụ a-kpalighe? 
?Bụ onye a-sụ lẹ ya ji iya ụgwo; tẹ ya bya akfụa ya ẹya; kẹ l'iphemiphe ọbule, nọ lẹ mgboko bụkota nk'iya. 
Ya ta adakwa ashị tẹ ya ba atụru ngu ọnu ọkpa ẹjo agiyi ono: ẹge o nwetaberu ọkpehu; mẹ ẹge ọ dụ-tabe ugvu l'ẹnya. 
?Bụ onye a-dụ ike phụa ya akpọ. ?Bụ onye a-dụ ike paru odogoro je iya l'ifu; lẹ ya eje iya ẹya eyeye? 
?Bụ onye a-tụ kparara je iya ọnyaha ọnu. Eze, nọ iya l'ọnu eyekwa egvu. 
Iphe, kpọru iya giriri l'azụ bụ iphe, e gude eze nze-ọgu. Iphe ono bẹ dzegbaberu ọnu; shihugbaa ike; 
swia nyịchingu; k'ọphu bụ lẹ phẹrephere te eshighedu lẹ mgbaku iya bahụ iya l'ẹhu. 
Ọ rakụtsuaru arakụru; tụgba bụru nanụ; k'ọphu bụ l'ẹ taa tụwadu iya ẹbo. 
Ọobuje; o -zee uze; ẹkoroku aghakahụ. Ẹnya iya dụ l'ọ bụ ẹke ẹnyanwu keru paa l'ụzo nchi-abọhu. 
Ọku, shi iya l'ọnu anọduje enwu kẹ phophopho. Ẹkoroku, shi iya nụ l'agba kpịrikpiri. 
Ẹnwuru-ọku eshije iya l'imi l'akpọ tụtutu l'ọ bụ ite, e shiberu; chịru ọphuruphu tsụbe iya. 
Ume, ọotu rua l'icheku-ọku, ọku ta nọdu; yọ gbanwuhu ọku. Ọ kwaphụ ẹge ono; bẹ ọku eshije iya l'ọnu enwu phophopho. 
Agburu-ẹhu, nọ iya l'olu emeje tẹ meji tọfu iphe bụ onye phụru iya nụ. 
Igbidigbi anụ, nọ iya l'ẹhu nyatsụaru l'eli ibe iya; k'ọphu bụ l'ẹ tọ dụdu onye a-dụ ike nyafụ-ghee ya. 
Ọkpoma iya kpọru gbengu l'ọ bụ mkpuma; shihu ike l'ọ bụ o-ji-l'ẹka mkpuma. 
O -gbeshi egbeshi; ndu, bụ ọ-ka-ike phẹ atsụhu egvu; gude ẹhu-anmanma gbalala azụ. 
E -gbua ya mma; b'ẹ tọ dụdu iphe, oome iya; ọphu ọ dụdu iphe, arwa; m'ọ bụ akfụ; ọ dụdu bụru ịkekee emeje iya. 
Ọonya-jishije ígwè l'ọ bụ ọwa; nya-kwoshia ope l'ọ bụ oshi, riru avụrukpa. 
Akfụ te emejekwa iya t'ọ gbaa ọso. Mkpuma adụjele iya-a l'e -wotaru udzu phee ya l'ẹhu. 
E -chia ya mgbọro; yo gbe dụ iya l'e chiru iya ọwa. A -tụa ya arwa; yọ chị l'iya-a ọchi. 
Ẹkiri, nọ iya l'ẹpho atsụ nkọ l'ọ bụ ọnu mbeji. Ọ -wụa awụwu l'ẹpoto; yọ dụ l'ọ bụ ẹke e swiru ígwè, e gude etsu witu. 
O -ruba l'ẹbo mini; yọ phụhu ụphu l'ọ bụ ite, e shiberu l'ọku. Teke o rubaru l'eze ẹnyimu; yọ tsụlahaa kfutukfutu l'ọ bụ manụ, e shiberu l'ọku. 
Ẹke, o shiru bẹ mini ebukahuje ẹbo; l'acha kẹ pemu-pemu. Mini ẹke, o shiru abụkotajeru ụphu kwasẹru. 
Ẹ tọ dụdu iphe, nọ lẹ mgboko-a yẹle iya ha. Ọ bụ iphe, e keru, ẹ ta atsụjedu egvu. 
Ẹ to nwedu ẹge iphe e-kube onwiya t'ọ gụbe iya iphe. Ọ bụ iya bụ eze l'iphe bụ iphe, eku onwiya ekuku.” 
