﻿Jobu.
21.
Jobu abya eyee ọnu; sụ: 
“Unu ngabekwa nchị ọhuma l'iphe-a, mu ekfu-a; t'ọ bụru ike, unu adụ mu. 
Unu takpẹlephu nshi; haa tẹ mu kfugee; unu achịwa mu rụ ọchi ọbu. 
Aphụ, mu agụ; ?bụ madzụ bẹ mu agụru iya tọo. ?Nanụ ẹke, mu e-gude ata nshi. 
Unu lee mu ẹnya; unu aphụ lẹ biribiri mu e-gude unu; unu akpọo beru. 
Ọobuje; mu -rịta iphe, meru mu nụ; egvu erua mu l'ẹhu; ẹhu anmahu mu kpakpakpa. 
?Bụ ngụnu meru iphe ndu ẹjo madzụ anọje ndzụ; kaa nka; bya enweru ike, dụ egvu. 
Ẹphe akajẹ nka; phụ ụnwu ẹphe; ẹphe evufuta; bya ebugbaaru shihu ike; gbaa ẹphe mgburumgburu; Ẹphe egude ẹnya ẹphe phụ ụnwu nwanwanwaranwa ẹphe. 
Nchileke ahaje ẹphe; too denyi ẹphe ẹka; to nwe iphe ọwaru-obu, adakfutaje ẹphe l'ufu. 
Oke-eswi ẹphe te eyebujedu ime eyebu; ọphu nyee-eswi ẹphe 'atsụ-bujedu ime atsụ-bu; tọ dụ ọphu epheje nwa iya. 
Ụnwegirima ẹphe edzebeje l'ọ bụ atụru; l'ebu nggada atụgbu. 
Ẹphe egude ogumogu; gude une; gude egvu; l'eme ẹmirima; l'aphụ opu eye iya. 
Ẹphe enweje ẹku; bua l'ẹhu-gudangu; kaa nka; laa lẹ nggu iya nk'ẹphe. 
Obenu l'ẹphe asụje Nchileke t'ọ haa ẹphe; l'ẹphe ta akpadu iya ishi. 
Ẹphe asụ: ‘?Bụ onye b'ọ bụ; mbụ Ọkaribe-Kakọta-Ike kẹ t'ẹphe l'ejeru iya ozi. ?Bụ ngụnu bẹ ẹphe e-rita l'okfu anụ iya.’ 
Ẹphe arịje l'ẹku, ẹphe kparu bụ ẹphebedua b'o shi l'ẹka. Ono bụ ẹke e shi; mu ta ayị l'idzu ndu ẹjo iya ono. 
Ọlobu; ?bụ ugbo ole b'a phunyiwaru urọku ndu ẹjo iya ono. ?Bụ ugbo ole bẹ iphe-ẹhuka dakfutawaru ẹphe, bụkwanu iphe-ẹhuka, ekoshi ẹhu-eghughu Nchileke l'ẹke ẹphe nọ. 
?Bụ ugbo ole b'a phụru ẹphe; ẹphe etsufu l'ọ bụ ẹswa, nọ l'ẹke phẹrephere ephe. ?Bụ ugbo ole b'a phụru ẹphe; ẹphe ekpofu l'ọ bụ ẹswa witu, phẹrephere kpotaru. 
Unu asụje lẹ Nchileke ewotaje àhụ̀hù, ọ ga àhụ̀ madzụ doberu ụnwu iya. T'o wotajenu àhụ̀hù ọbu hụ̀a onye, meru iya nụ; k'ọphu onye ọbu a-maru l'ọ bụ iphe, ya meru; bẹ ya ala ụla iya. 
T'onye ono gude ọnu iya taa ẹja l'igbo, ọ nyịru nshị. Yọ ngụa oke ẹhu-eghughu Ọkaribe-Kakọta-Ike ọngu mini. 
Ishi iya abụru; onye nwụhuru anwụhu; ?ọokpakwadu ishi ụnwegirima iya ndu ọphu ọ haru. 
?O nweru onye e-zighe Nchileke mmamiphe; l'ẹke ọ bụ iya gbe ekpeje ndu k'eze iya ono ikpe. 
O nweru ndu anwụhuje teke ẹ-to nwedu iphe ẹphe achọ achọcho; 
mbụ teke ẹhu dzuru ẹphe oke; ọkpu eshihu ẹphe ike. 
Yo nweru ndu ọphu anọduje taa kpọkpokpo; nwụhu; to nwe m'ọ bụ ujiku lanụ, ẹhu tsọjeru ẹphe ẹna. 
Ẹphe ẹbo bụ l'ẹja; bẹ ẹphe tụko ala; yọ bụru ẹge ẹhonwu taru onye ọphu; bẹ ọo-ta onye ọphu. 
Iphe, unu arị; bẹ mu makọtakwaru-a; mbụ ẹjo idzu ono, unu achịru mu ono. 
Unu ajịje; sụ: ‘?Bụ awe bẹ ụlo oke amadụ ono nọhunu; mbụ ụlo ono, ndu ẹjo madzụ shi buru ono?’ 
?Unu ta jịbua ndu nọ l'ụzo ije ajị. ?Unu ta tọbua nwẹhu gbua igo l'akọ ẹphe. 
L'ẹjo madzụ abụje: ụmuruku -bya amụru iya; a nafụta iya; oke ẹhu-eghughu kẹ Nchileke -bya abya; a dzọo ya. 
?Bụ onye e-vudo-ghe ẹjo madzụ l'ifu, kfuru iya iphe oome? ?Bụ onye a-kfụ-ghe iya ụgwo iphe, o meru? 
Aapatajẹ iya je elia; wata oche ili iya nche. 
Ẹja alị anọduje echeru odzu iya echeru; ndiphe l'awụ etso iya; ndu, byaru ẹkwa iya aka nkụ. 
Mbụ ?nanụ ẹge unu e-me gude mkpọkoro okfu-a, unu ekfu-a dụa mu ike. Ẹ to nwehekwa iphe, phọduru unu l'ọnu; gbahaa ẹjo-ire.” 
