﻿Jobu.
12.
Tọ dụ iya bụ; Jobu abya eyeeru iya ọnu sụ: 
“Ẹ t'a tụdu iya atụtu; l'ọo unubẹdua bụ o-kfua-ọ-gvụ. Ị -nwụhu; mmamiphe etsoru ngu. 
Ọlobu; mẹ mu nwekwarua egomunggo l'ọ bụ unubẹdua. ?O nweru ẹge ọdo, unu bya aka mu ọdo tọo? ?Bụ onye bụ onye ẹ ta madu iphe ono, iikfushi ono l'ọ ha? 
Nta-a; bẹ mu bụwa iphe, ndu ọ̀nyà mu gude agba mgba-ọnu; mbụ mụbe onye shi akpọ-kuje Nchileke; yọ za mu. Mu bụwa iphe-ọchi; lẹ mụbe onye doberu ẹka ndoo; ụta ta nọ mu l'ẹhu. 
Ndu iphe dụru lẹ mma ta amajẹdu iphe, bụ lẹ madzụ nọ l'iphe-ẹhuka. Ẹphe asụje l'ọo ndu ẹturu lọru b'a mụru iphe-ẹhuka yeru. 
Obenu l'ufu ndu abalị-d'egvu te nwedu onye akpa ẹphe ẹhu. Ndu akpatsu Nchileke iwe te gbe dụdu iphe, eme ẹphe; mbụ ndu ono, gude ọgvu ẹphe l'ede ono. 
Obenu; ọ -bụru l'unu achọ tẹ iphe doo unu ẹnya; unu je ajịta ụnwu-anụ-ẹgu; m'ọ bụ ụnwenu. 
Teke ẹ tọ dụdu; unu kfuru eliphe t'o zia unu iphe. Ọ -dụdu; unu ahaa t'ẹma, nọ lẹ mini zia unu iphe. 
?Bụ onye ole l'iphe ono, mu gụshiru ono ta madu l'ọo Ojejoje gude ẹka iya mee iphe-a, meru nụ-a? 
Ọ bụ Nchileke bẹ ndzụ iphemiphe ọbule, o keru ekeke nọ l'ẹka; bụru iya gude ume, onyemonye ọbule atụ. 
?Tọ bụdu ẹge ono, nchị egeje iphe, ọ nụru egege ono; bụ ẹge ire edejeodu ọnu l'iphe, oo-ri. 
?Tọ bụdunua l'ẹka ndu bụ ọgurenya; bẹ eeshije mụta iphe; bụru onye karu nka bẹ iphe edoje ẹnya. 
Ọ bụ Nchileke nwe mmamiphe; mẹ ike. Ìdzù yẹle iphe odo ẹnya abụkwaruphu nk'iya. 
Iphe, bụ iphe, o nwutsuru enwutsu ta dụkwa onye a-dụ ike kpụ-kwaa ya; ọphu ọ dụkwa onye a-dụ ike tụ́hàà onye ọ tụru mkpọro. 
Ọ bụ Nchileke bụ: o -gbochia tẹ mini ba achị; ẹjo mkpọ-anwụ abya. Teke ọ tụharu ugbo; yọ bụru utso. 
Ọ bụ Nchileke bẹ ike; mẹ mmamiphe nọ l'ẹka; bụkwaru iya phụ b'ọ nọ l'ẹka; mbụ onye ụgho; mẹ onye ọoghoru iya. 
Ndu akpọ-ziru ndu ọdo ụzo; bẹ ọotuje too; mee ndu ikpe t'ẹphe bụru ndu eswe. 
Oomeje ndu eze t'ẹphe shi l'ọkwa-eze ẹphe; bya abụru ohu. 
Ndu, achịjeru Nchileke ẹja; bẹ ọochifuje ọkpa l'alị; wofu ẹphe. Ndu, bụ ndu vudowa nụ; bẹ onwutsuje. 
Ndu e gude ire ẹphe ẹka; bẹ oomeje t'ẹphe ba mahẹ iphe, ẹphe e-kfu. Ndu, bụ ọgurenya; bẹ ọonafuje egomunggo t'iphe be edohe ẹphe ẹnya. 
Ndu, bụ ndu, a maru ẹpha ẹphe; bẹ ọonmaje phulaphula. Ndu, bụ ndu ike nọ l'ẹka; bẹ oomeje; ike agvụ ẹphe. 
Ookoshije iphe, dụ ogvu ogvu, nọ l'ọchi; l'emeje iphe, gbaru tsụbalangu; t'ọ bụru iphoro. 
Ọ bụ iya emeje tẹ mba bụru eze mba; bụru iya echikaje iya. Ọ bụ iya emeje tẹ mba zụa azụzu; bụru iya achịkashije iya. 
Ọonafuje ndu ishi kẹ mgboko-a egomunggo; nwuru ẹphe ye t'ẹphe wata ọgha-phe ebedere-badara. 
Oomeje t'ẹphe etsutso etsutso; l'akpọ galagala l'ọ bụ onye mẹe guderu.” 
