﻿Jóshuwa.
12.
Ọwaa ndu eze alị ono, ndu Ízurẹlu lụ-gbushiru; naa alị ẹphe l'ụzo ẹnyanwu-ahata Ẹnyimu Jọ́danu azụ iya ọphu. Alị ono shi lẹ nsụda nsụda Amọ́nu je akpaa lẹ Ugvu Hẹmonu. Ẹphe lụkwaruphu iphe, bụ alị, nọ l'ụzo ẹnyanwu-ahata ẹke iya kẹ Araba. Ndu eze ọphu bụ: 
Sihọnu, bụ eze ndu Amọru. Ẹke o shi buru bụ lẹ Hẹ́shibonu. Ẹke o shi achị abụru Árowa, nọ lẹ nsụda nsụda Amọ́nu. O shi l'ẹke ono nọo jeye l'ẹ Ẹnyimu Jábọku, bụ ókè-alị ndu Amọnu, bụ iya bụ nkere-ẹbo Gíledu. 
Ọ chịkwaruphu ụzo ẹnyanwu-ahata Araba; shi l'ẹke ono chịa jeye lẹ Eze Ẹnyimu Kínẹretu; je akpaa lẹ Eze Ẹnyimu Araba. Ọ chịkwaruphu jeye lẹ Bẹ́tu-Jeshimọtu; ruwaru l'ọkpa-ugvu Pishiga. 
Ẹphe lụkwaruphu alị Ogu, bụ eze ndu Báshanu. Ogu tso lẹ ndu wafụru nụ lẹ ndu ikfu Réfa. Ọ bụ iya shi bụru eze ndu Ashụtarotu; mẹ kẹ ndu Edereyi. 
Ndu, o shi achị bụ ndu Ugvu Hẹmonu; ndu Saleka; ndu alị Báshanu kpamukpamu; je akpaa l'ókè-alị ndu Geshu; mẹ kẹ ndu Maaka. Nkere-ẹbo alị ndu Gíledu jeye l'ókè-alị Sihọnu, bụ eze ndu Hẹ́shibonu bụkota ẹke o shi achị. 
Ọ bụ nwozi Ojejoje; mbụ Mósisu yẹle ndu Ízurẹlu lụ-gburu ndu eze labụ ono. Mósisu, bụ nwozi Ojejoje abya eworu alị ono nụ ndu ikfu Rúbẹnu; ndu ikfu Gádu; mẹ nkere-ẹbo ndu ikfu Manásẹ. 
Ọwaa bụ ndu eze ọphu, bu l'ụzo ẹnyanwu-arịba Ẹnyimu Jọ́danu, bụ Jóshuwa yẹle ndu Ízurẹlu lụ-gburu ẹphe. Alị ndu eze ono shi lẹ Bálụ-Gádu, nọo jeye lẹ nsụda Lébanọnu; je akpaa l'ugvu Halaku, nọru jeye l'e gude ala Séyi. Jóshuwa abya eworu alị ono keeru ndu Ízurẹlu l'ikfu l'ikfu t'ọ bụru òkè-iphe ẹphe. 
Alị ono bụ alị ugvu; mẹ nsụda ụzo ẹnyanwu-arịba; mẹ Araba; mẹ alị, nọ lẹ mgbazita ugvu ugvu; echi-ẹgu; mẹ ụzo ọhuda. Mbụ l'alị ndu Hetu; kẹ ndu Amọru; kẹ ndu Kénanu; kẹ ndu Pẹ́rezu; kẹ ndu Hevu; mẹ kẹ ndu Jebusu. 
Ndu Ízurẹlu lụ-gburu onye eze kẹ ndu Jériko; onye eze kẹ ndu Eyayi, nọnyabe Bẹ́telu; 
onye eze kẹ ndu Jerúsalemu; onye eze kẹ ndu Hẹ́buronu; 
onye eze kẹ ndu Jamútu; onye eze kẹ ndu Lakíshi; 
onye eze kẹ ndu Egulọnu; onye eze kẹ ndu Géza; 
onye eze kẹ ndu Débi; onye eze kẹ ndu Geda; 
onye eze kẹ ndu Họma; onye eze kẹ ndu Áradu; 
onye eze kẹ ndu Libina; onye eze kẹ ndu Adulámu; 
onye eze kẹ ndu Makéda; onye eze kẹ ndu Bẹ́telu; 
onye eze kẹ ndu Tapúwa; onye eze kẹ ndu Hefa; 
onye eze ndu Afẹku; onye eze kẹ ndu Lasharọnu; 
onye eze kẹ ndu Madọnu; onye eze kẹ ndu Házọ; 
onye eze kẹ ndu Shimurọnu Merọnu; onye eze kẹ ndu Akụshafu; 
onye eze kẹ ndu Ténaku; onye eze kẹ ndu Megido; 
onye eze kẹ ndu Kedeshi; onye eze kẹ ndu Jọkuníyamu, nọ lẹ Ugvu Kamẹlu; 
onye eze kẹ ndu Dọo, nọ lẹ Nafotu Dọo; onye eze kẹ ndu Goyimu Gíligalu; 
mẹ onye eze kẹ ndu Tíza. Iphe, ẹphe tụko dụ bụ ụkporo ndu eze lẹ ndu eze iri lẹ nanụ. 
