﻿Ditoronomi.
33.
Ọwaa bụ ọnu, onye kẹ Nchileke, bụ Mósisu gọru nụ ụnwu Ízurẹlu b'ọ nwụhuderu. 
Ọ sụru: Ojejoje shi l'ugvu Sáyịnayi bya. O shi l'ụzo alị Séyi nwuaru ẹphe phoo l'ọ bụ nchi-abọhu. O shi l'ugvu Paranu l'echiru ẹphe oswi kẹ zaaa. Ndu, ẹphe l'iya yị bụ ụnukurunu ndu, dụ nsọ; bya aparu ọku, l'enwu enwunwu l'ẹka-ụtara iya. 
Mbụ lẹ ndiphe b'o yeru obu; iphe, bụ ndu dụ nsọ nọkota iya l'ẹka. Ẹphe adaje iya l'iku ọkpa; baaru iya ẹja. Yọ bụru iphe, o kfuru bẹ ẹphe emeje. 
Mósisu tụru ekemu doberu ayi; ọ bụru òkè-iphe kẹ ndu awa Jékọpu l'ẹphe ha. 
Ọ bụ Ojejoje bụ eze ndu Jeshurunu teke ono, ndu ishi ndu Ízurẹlu; ẹphe lẹ ikfu ndu Ízurẹlu l'ẹphe ha dzukoru ono. 
“Tẹ ndzụ bụkwaru kẹ ndu ikfu Rúbẹnu! T'ẹ b'o chịhukwa achịhu; ọphu ọ kakwa nwanshịi!” 
Ọwaa bụ iphe, o kfuru l'ẹhu ndu ikfu Júda: “Byiko Ojejoje; nụkwaa olu ndu Júda! Dutakwa ẹphe dukfuta ndu nk'ẹphe! Mekwaa t'ẹka shia ẹphe ike l'ọgu. Byiko; yejenuru ẹphe ẹka t'ẹphe lụ-gbua ndu ọhogu ẹphe!” 
Ndu ikfu Lívayi b'o kfuru nk'ẹphe; sụ: “Nggụbe Ojejoje; menua tẹ ndu ikfu Lívayi gudeje ẹnwa, bụ iya bụ tumimu; mẹ urimu ngu; maru iphe, bụ uche-obu ngu! Mbụ ndu ono, ị dataru lẹ Masa; okfu adaaru nggu l'ẹphe lẹ mini Meriba ono. 
Ọ bụ ẹphe bẹ kfuru kẹ nne lẹ nna ẹphe; sụ l'ẹ t'ọ dụkwa iphe, ẹphe gụberu ẹphe. Ẹphe amịa ụnwu, ẹphe mụru amụmu ẹnya; mịkwaaphu unwunne ẹphe ẹnya. Obenu l'ẹphe ziru obu l'ome okfu ngu; nggụbe Ojejoje; bya edobekwaphu ọgba-ndzụ ngu. 
Ọ bụ ẹphe e-zije ndibe Jékọpu iphe, ị sụru t'e emeje; bụru ẹphe e-zije ndu Ízurẹlu iphe, ị tụru l'ekemu. Ọ bụ ẹphe e-dobejeru ngu ínsẹnsu; bụru ẹphe e-dobeje ngwẹja-ukfuru l'ẹnya-ngwẹja ngu. 
Byiko Ojejoje; gọru ọnu-ọma ye l'akanya, ẹphe ese; nggu anatajẹkwa ozi, ẹphe gude ẹka ẹphe jee! Nyakakwaa ẹphe ọkpu-nka; mbụ ndu ono, wụ-lihuru etso ẹphe okfu ono; mẹ ndu kpọru ẹphe ashị; k'ọphu ẹphe ta adụhedu ike ọpa-li ishi apali ọdo!” 
Ndu ikfu Bénjaminu b'o kfuru nk'ẹphe; sụ: “Ndu Ojejoje yeru obu a-nọnyabe Ojejoje; tụsaru ẹhu; kẹle Ojejoje anọduje egbochita ẹphe: eswe l'ẹnyashi. Ndu Ojejoje yeru obu; bẹ ọokwojeru l'azụ.” 
Ndu ikfu Jósẹfu b'o kfuru nk'ẹphe; sụ: “T'alị ẹphe bụkwaru alị, Ojejoje gọru ọnu-ọma nụ. Yo mee t'iji, shi l'imigwe dajẹru ẹphe; mini ime-alị amụru ẹphe fụtufutu. 
T'anwụ mejekwaa t'iphe, e meberu l'alị mehu! Yo mee t'iphe, kakọta mma ruje ẹphe ẹka l'ọnwa l'ọnwa! 
T'a nụkwa ẹphe iphe, katsụkpo mma, shi l'alị ugvu ndiche ono; yẹle ẹgiri iphe, shigbaa l'ụnwu ugvu ojejoje ono! 
T'e gudekwa iphe, katsụa mma, jiru mgboko-a gọoru iya ọnu! T'ikfu Jósẹfu tụbakwa onye ono l'ẹnya; mbụ onye ono, nọ l'iru oshi ono, enwu ọku ono! T'iphemiphe ọbule-a bụkotakwaru kẹ Jósẹfu; mbụ onye ono, bụ iya bụ ishi l'unwunne iya ono. 
Ọ dụ biribiri l'ọ -bụ oke-eswi, ụzo waa nne iya ọswa. Mpo iya dụ l'ọ bụ k'atsụ. Yọ bụru iya bẹ oo-gude adụ-tsushi iphe bụ mbakeshi; mbụ jeye lẹ ndu bu l'ẹke mgboko jeberu. Ọ bụ ẹge ono; bẹ ụnukurunu ndu ikfu Ífuremu dụ; bụkwaruphu ẹge ono bụ ẹge 'agụta agụta ndu ikfu Manásẹ dụ.” 
Ndu ikfu Zébulọnu b'o kfuru nk'ẹphe; sụ: “T'ẹhu tsọje unu ẹna unubẹ ndu ikfu Zébulọnu; teke unu alụfu alụfu. Ẹhu atsọjekwaphu unu ẹna unubẹ ndu ikfu Ísaka; teke unu nọ l'ufu unu. 
Ẹphe e-ku ndiphe t'ẹphe dzukoo l'ugvu; nọdu l'ẹke ono gwoo ngwẹja l'ụzo, vudo nhamụnha. Yọ bụru iphe-ọma, jiru eze ẹnyimu; mẹ ẹku, domigbaaru onwiya l'alị eveve; bẹ ẹphe e-gude buru.” 
Ndu ikfu Gádu b'o kfuru nk'ẹphe; sụ: “T'ọnu-ọma bụru k'onye meru t'alị ndu ikfu Gádu jaa ajaja. Ndu ikfu Gádu zẹkwa l'ọ bụ agụ. Iphe bụ iphe, ẹphe phụru; bẹ ẹphe ezijashije ẹka yẹle ishi. 
Ọ fọtaru alị, kakọta mma doberu onwiya; kẹ l'ọ bụ ẹke, oke-alị kẹ ndu ishi ndu sọja nọ; bẹ ndu ishi ndu Ízurẹlu edzukobeje; mee iphe vudo nhamụnha l'ifu Ojejoje; bya edobe iphe, ọ sụru t'e meje.” 
Ndu ikfu Dánu b'o kfuru nk'ẹphe; sụ: “Lẹ ikfu Dánu bụkwa nwa agụ, shi lẹ Báshanu akfụ gadamu gadamu eje abya.” 
Ndu ikfu Náfutali b'o kfuru nk'ẹphe; sụ: “Lẹ ndu Náfutali bẹ tụbaakwaru Ojejoje l'ẹnya. Ọnu-ọma Ojejoje abụkwaruphu nk'iya. Ókè-alị iya bẹ shi l'ụzo eze Ẹnyimu Gálili; jerua l'ụzo ọhuda.” 
Ndu ikfu Ásha b'o kfuru nk'ẹphe; sụ: “T'ọnu, a gọru ụnwu Ásha kakọtakwa k'ụnwegirima ọdo. T'ẹphe tụbakwa unwunne ẹphe l'ẹnya. T'ọkpa iya dekwaru ederu lẹ manụ. 
T'iphe, unu e-gudeje gụ-chia nggamgbo unu bụkwaru ígwè yẹle ope. Ọ bụ ẹge unu a-nọ-bebe; bụ ẹge ike unu e-beru.” 
“Ẹ tọ dụkwa onye dụ l'ọ bụ Nchileke kẹ Jeshurunu; onye eswetaje igweli bya agbaaru unu mkpu; l'egudeje akpabiri iya swee urukpu. 
Ọ kwa Nchileke ono, shi l'ede-nwede ono bụ onye unu a-nọduje l'ime iya zeeru ndzụ. Oo-woru ẹka iya dẹe unu adẹe; gude iya l'anụ unu ọkpu ike-ike jeyewaru. Ọochifuje unu ndu ọhogu unu l'ifu; sụ: ‘Unu tụko ẹphe gbushikota!’ 
Ọo ya bụ lẹ ndu Ízurẹlu e-buru l'ẹhu-agu. Eri Jékọpu atụsaru ẹhu l'alị akpe yẹle mẹe nọ. Iji eshi l'igweli l'adaru ẹphe. 
Ọnu-ọma bụ kẹ unubẹ ndu Ízurẹlu. ?Bụ ndu ole ọdo, dụ l'ọ bụ unu; unubẹ ndu ono, Ojejoje dzọfutaru ono? Ọo yẹbedua bụ onye egbochitaje unu; bya abụru onye eyejeru unu ẹka. Ọ kwaphụ yẹbedua bụ ogu-mbeke, unu gude eku onwunu. Ndu ọhogu unu e-gude ọtsu egvu byakfuta unu; unu adzọpyashia ẹke ẹphe agwajẹ iphe adzọpyashi.” 
