﻿Ọ́gú.
23.
Bélamu asụ Balaku: “Kpụaru iya ẹnya-ngwẹja ẹsaa. Nggu akpụtaru iya oke-eswi ẹsaa; waa ebyila ẹsaa.” 
Balaku abya emee ẹge Bélamu kfuru. Ẹphe ẹbo egbua oke-eswi; mẹ ebyila ono nanụ nanụ l'ẹnya-ngwẹja ono iche l'iche. 
Bélamu asụ Balaku: “Vudo lẹ mgboro ngwẹja-ukfuru ono tẹ ya tụgbua. O nweru ẹge ọo-dụ; Ojejoje abyakfuta iya. Iphe, bụ iphe, o koshiru iya bẹ ya a-kọru ngu-a.” Yọ tụgbua jeshia l'eli nwugvu, ẹ-ta adụdu iphe, nọ iya nụ. 
Nchileke abyakfuta Bélamu. Bélamu asụ Nchileke: “Ya doziwaru ẹnya-ngwẹja ụzo ẹsaa; bya egbuwa oke-eswi yẹle ebyila nanụ nanụ l'ẹnya-ngwẹja ono ẹphe ẹsaa.” 
Tọ dụ iya bụ; Ojejoje eye Bélamu okfu l'ọnu sụ iya: “Laphu azụ jekfu Balaku je ezia ya ozi-wa.” 
Yo jekfushia Balaku; bya aphụ iya ẹge oovudo lẹ mgboro ngwẹja-ukfuru ono yẹle ndu ishi Móabu l'ẹphe ha. 
Bélamu ekfulahaa; sụ: “Lẹ Balaku byaru bya eduta iya lẹ Áramu; Eze ndu Móabu; eduta iya l'alị ugvu ụzo ẹnyanwu-ahata; sụ iya: ‘Tẹ ya tụaru iya ụnwu Jékọpu ọnu; ya ekfubyi-a ụnwu Ízurẹlu ekfubyi!’ 
Ọ bụ; ?nanụ ẹge ya e-shi tụa ndu Nchileke ẹ-ta atụdu ọnu ọnu. ?Nanụ ẹge ya e-shi kfubyia ndu Ojejoje ẹ-te kfubyidu? 
Ọo l'eli eze mkpuma; bẹ ya anọduje phụ ẹphe. Yọ bụru l'eli ugvu; bẹ ya anọduje ele ẹphe ẹnya; mbụ ndu ono, dụ iche ono. Ẹphe ta agụjeduru onwẹphe eyeru ndu ọhodo. 
?Bụ onye a-dụ ike gụta ụnwu Jékọpu l'ọgu; mbụ ndu ha l'ọ bụ evevee, nọ l'alị. Mbụ; ?bụ onye a-dụ ike gụta nkere-ẹno ụnwu Ízurẹlu l'ọgu. Tẹ ya nwụhukwa anwụhu onye doberu ẹka ndoo! Tẹ ya lakwaa ẹge ndu doberu ẹka ndoo alajẹ!” 
Balaku asụ Bélamu: “?Bụ ngụnu b'i meru iya ẹge ono? Ya sụru ngu t'ị bya atụa ndu ọhogu iya ọnu; yo gbe bụru ọnu b'ị gọru nụ ẹphe!” 
Bélamu asụ: “?Bụ tẹ ya be kfushi iphe, Ojejoje yeru iya l'ọnu tẹ ya kfua tọo?” 
Balaku asụ Bélamu: “Tsoru iya t'ẹphe je l'ẹke ọdo, ịi-nọdu phụ ẹphe. Ẹ tịi phụkotakwa ẹphe l'ẹphe ha. Ọ kwa ụphodu l'ime ẹphe bẹ ịi-phụ. Shi l'ẹke ono tụaru iya ẹphe ọnu.” 
Balaku eduta Bélamu; ẹphe ejeshia l'ẹgu mkpụkpu Zofimu, nọ l'eli ugvu Pishiga; yọ kpụa ẹnya-ngwẹja ụzo ẹsaa. Ẹphe egbushia oke-eswi yẹle ebyila nanụ nanụ l'ẹnya-ngwẹja ono iche l'iche. 
Bélamu asụ Balaku: “Vudo lẹ mgboro ngwẹja-ukfuru ono tẹ ya jekfu Ojejoje l'ẹkaphu.” 
Ojejoje abyakfuta Bélamu; bya eye iya okfu l'ọnu; sụ: “Laphu azụ ọdo je ezia Balaku ozi-a.” 
Bélamu abya ejekfu Balaku; phụa ya l'ẹke oovudo lẹ mgboro ngwẹja-ukfuru ono yẹle ndu ishi Móabu, yẹle iya tụko nọdu. Balaku asụ Bélamu: “?Bụ ngụnu bẹ Ojejoje kfuru?” 
Bélamu ekfushilahaa; sụ: “Nggụbe Balaku; gbeshi egbeshi ngabẹ nchị! Nụa iphe, ya ekfu; nggụbe nwatibe Zipo. 
Nchileke ta abụkwa madzụ mmanu; k'ọphu ọo-bya adzụlahaa ẹjo-ire. Ọphu ọ bụkwanu nwa ndiphe; kẹ t'ọ gbanwee obu iya. ?O kfujewaru okfu; to me iya ẹge o kfuru? ?O kwejeru ụkwa iphe; to medzu ụkwa iphe ọbu tọo? 
Mbụ l'agha; ozi, ya nataru bụkwa tẹ ya gọoru ndu ono ọnu. Nchileke gọwaru ẹphe ọnu; ọphu ya ta a-dụkwa ike agbanwe iya. 
Ẹ tọ dụdu iphe, dụ ẹji, ọ phụru l'ẹhu ụnwu Jékọpu; ọphu ọ dụdu iphe, ẹ-ta dụdu mma, ọ phụru l'ẹhu ụnwu Ízurẹlu. Ojejoje, bụ Nchileke ẹphe swiru ẹphe ọkpobe eswiru. Ẹphe anọduje atụ ụzu l'ọ bụ eze ẹphe. 
Nchileke; bẹ dufutaru ẹphe lẹ Íjiputu; bya emee ẹphe; ẹphe enweru ọkpehu l'ọ bụ atsụ. 
Ẹ te egudeghedu ọgvu gwọta ụnwu Jékọpu. Ọphu eegudeghedu agwụgwo mekata ụnwu Ízurẹlu. Nta-a bẹ ee-kfu okfu ẹhu ụnwu Jékọpu; kfua okfu ẹhu ụnwu Ízurẹlu; sụ: ‘Unu leduduphu iphe, Nchileke meeberu!’ 
Ndu Ízurẹlu angụ-lihuje l'ọ bụ nne agụ. Ẹphe anọduje ebu nggada l'ọ bụ agụ, ẹ-ta azẹjedu azẹe jeye yọ labushia anụ, o gburu; mbụ jeye; yọ ngụa mee-iphe, o guderu.” 
Tọ dụ iya bụ; Balaku asụ Bélamu: “Ba tụkwa ẹphe ọnu lẹ phuu; ọphu ị gọkwaru ẹphe ọnu lẹ phuu!” 
Bélamu asụ Balaku: “?Ya te kfuduru ngu l'ọo iphe, Ojejoje kfuru bẹ ya e-me?” 
Tọ dụ iya bụ; Balaku asụ Bélamu: “Bya tẹ ya duru ngu je ẹke ọdo. O nweru ike; yọ dụ Nchileke mma t'i shi l'ẹke ono tụaru iya ẹphe ọnu.” 
Balaku eduta Bélamu; ẹphe enyihu ọnonu ugvu Peyọ; mbụ ugvu ono, nọ chebe ifu l'alị, daburu swanmangu ono. 
Bélamu asụ Balaku: “Kpụaru iya ẹnya-ngwẹja ẹsaa l'ẹke-a; nggu akpụtaru iya oke-eswi ẹsaa; ọwaa ebyila ẹsaa.” 
Balaku emee ya ẹge Bélamu sụru t'o mee ya. Ẹphe egbua oke-eswi ono yẹle ebyila ono nanụ nanụ l'ẹnya-ngwẹja ono iche l'iche. 
