﻿Mbụlembu.
49.
Ya ndono; Jékọpu abya ekua ụnwu iya; sụ ẹphe: “Unu dzukobe tẹ ya kọoru unu iphe, a-mụru unu l'ụzo l'ifu! 
Unu dzukoo; ngabẹru iya nchị; unubẹ ụnwu yẹbe Jékọpu! Unu ngabẹru iya nchị; yẹbe nna unu Ízurẹlu! 
Rúbẹnu; ọ bụ nggu bụ ọkpara iya; bya agbụru-ike iya; Ọ bụ nggu vu ụzo kpọ iya ifu; koshi lẹ ya bụ nwoke. Ọ bụ nggu bẹ aa-kakọta ọkwabe ugvu; bụru nggu a-kakọta ike. 
Keshinu ọphu ịitu akpara l'ọ bụ utso; b'ẹ tịi kahẹdu ndu ọphu. Ishi iya abụru lẹ nggu lẹ nyee nna ngu zẹru; nggu eshi ẹge ono farụa oshi-azẹe nna ngu. 
Símiyọnu; mẹ Lívayi bụ unwunne. Ẹphe e-gudeje ogu-mbeke l'eme iphe-kpaa. 
Ya te etsokwa l'ẹjo idzu, ẹphe achị; to nwe lẹ ya anọo l'ẹke ẹphe nọ; kẹ l'ẹphe gude ẹhu-iwe gbushia ndiphe; bushia oke-eswi akwara-achị kẹ manụ. 
T'ẹhu-eghughu ẹphe ono vukwaru mburọnu; kẹ l'ẹphe nwenukaru ọkpoma-ọku. T'ọkpoma-ọku ẹphe ono vukwaru mburọnu; kẹ l'ẹphe nwụnukaru ọnwuu. Ya a-chịkashi ẹphe t'ẹphe dzuru alị Jékọpu; dokashia ẹphe; t'ẹphe dzuru alị Ízurẹlu kpamu. 
Júda; ụnwunna ngu phẹ a-nọdu aja ngu ajaja. Ndu ọhogu ngu; bẹ ịi-pyịtaje l'ẹkpiri. Ụnwunna ngu l'ẹphe ha a-nọdu ebyiru ngu ikpere l'alị. 
Júda; ị bụ nwa agụ. Nwa mu; i shiwa l'ẹke i gbushiru anụ lata. Nta-a b'i byishiwaru ikpere l'ọ bụ agụ. Ị zẹwa l'ọbu nne agụ; ?bụ onye ha kẹ t'ọ kpatee ngu? 
Júda ta abụ-buhudu eze abụ-buhu. Mgbọro-eze ono te nwedu l'ọ lụfu ngu l'ẹka; gbururu jeye teke onye ọ kụru ishi l'ẹka a-bya. Ọ -byalẹphu bẹ iphe bụ mbakeshi a-nọdu anụru iya okfu. 
Oo-libeje nkakfụ-ịgara iya l'oshi vayịnu; Nwa nkakfụ-ịgara iya ono; bẹ oo-libeje l'oshi vayịnu, katsụkpo amịmi. Oo-gudeje mẹe saa uwe iya; gude mini akpụru vayịnu ono, ekeje kfụu ono l'asa uwe-eze iya. 
Ọo-ngụtaje mẹe; ẹnya achaa ya vịi; yọ ngụa ẹra eswi; eze acha iya pemu-pemu. 
Zébulọnu e-buru l'iku eze ẹnyimu. Ọnu-ẹnyimu iya a-bụru ọdu ụgbo-mini; Ókè-alị iya eje akpaa lẹ Sayịdonu. 
Ísaka bụ nkakfụ-ịgara, shihuru ike. Ọoze azẹe lẹ mgbaku ẹkpa-ivu labụ. 
Teke ọ phụru ẹge ẹke ọonoduje atụta ume dụta-be mma; mẹ ẹge alị iya dụ-be ugvu; bẹ ọo-pata ivu-ẹra iya tukobe onwiya l'ukuvu; ghọo ohu; jelahaa ozi mkpọ-nyi-ẹnya. 
Dánu a-nọduje ekpe ndu nk'iya ikpe, dụ mma; l'ọ bụ ndu ikfu ndu Ízurẹlu ndu ọphu. 
Dánu a-dụ l'ọ bụ agwọ, nọ l'iku ụzo; mbụ l'ọ bụ ogiji, nọ l'iku ụzo, abụje: ọ -taa ịnya ẹra l'ichirukfu; ịnya ọbu atụfu onye agba iya nụ. 
Nggụbe Ojejoje; ya ele ẹnya tii dzọo yẹbe Jékọpu. 
Gádu bẹ ndu ọ-lụa-ọlaa a-fụru; Obenu l'ịi-chị ẹphe agada-eru-alị. 
Ásha a-nọdu akọfuta nri, dụ mma. Nri, ọo-nọdu akọ bụ nri, atsọ ẹna; bụru nri, gbaru ndu eze. 
Náfutali bụ ele, akfụ ẹge ọ dụ iya. Ọonoduje amụshi ụnwu, ama mma. 
Jósẹfu bụ oshi vayịnu, mịru akpụru wọkfuru awọkfuru. Ọ bụ vayịnu, gvuru l'iku mini l'amị akpụru ntụmatu; Ẹkali iya abakahụ; tụko ụpho-mkpuma sweta. 
Ndu akfụ gude ẹhu-eghughu tso iya ọgu. Ẹphe egude akfụ ono gbanwụa ya ẹhu; 
Obenu l'akfụ iya shihulerua ike ẹge o shihuru iya; ọkpu ẹka iya eshihu ike. Yọ bụru ike kẹ Ọkaribe kẹ Jékọpu; bẹ kparu iya nụ; mbụ onye ono, bụ iya bụ onye nche atụru; bụru iya bụ oke mkpuma kẹ Ízurẹlu ono. 
Onye ike ono shi l'ẹka bụ Nchileke kẹ nna nggụbe Jósẹfu, bụ onye eyejeru ngu ẹka; Mbụ onye ono, bụ Ọkaribe-Kakọta-Ike, bụ iya agọjeru ngu ọnu-ọma. Ooshije lẹ mini achịchi gọoru ngu ọnu; shi lẹ mini ime-alị; gọoru ngu ọnu; shi l'elu; mẹ nwa gọoru ngu ọnu. 
Ọnu ọphu nna ngu gọru ngu kakwa k'eze ugvu ndiche; ka ụkwa k'ugvu, shi l'oge ndiche. T'iphe-ọma ono l'ọ ha bụkwaru kẹ Jósẹfu; mbụ kẹ onye ono, a fọfuru; dobe iche l'ẹke unwunne iya phẹ nọ ono. 
Bénjaminu bụ ẹjo nkụta-ọswa, ẹgu egvu akụrepho kfurukfuru. O -bee l'ụtsu; yọ taa anụ, o gburu. O -bee l'urẹnyashi; yo kee iphe, ọ lụtaru l'ọgu.” 
Ndu ono bụkota ndu ikfu Ízurẹlu; ẹphe iri l'ẹbo. Iphe ono bụkota iphe nna ẹphe kfuru nụ ẹphe teke ọogoru ẹphe ọnu. Iphe, bụ onyenọnu b'ọ gọru ọnu, gbaru iya nụ nụ. 
Ya ndono; yọ bya ekeeru ẹphe ekpe; sụ ẹphe: “Lẹ ya abyaakwa ọla-kfu ndiche iya phẹ. Unu likwa-a ya l'ẹke e liru nna iya l'ọgba, nọ l'alị Éfurọnu, bụ onye Hetu; 
mbụ ọgba ono, nọ l'alị Makupela l'iku Mamure lẹ Kénanu, bụ ẹke Ébirihamu zụru Éfurọnu onye Hetu yẹle alị, tso iya nụ t'ọ bụru ẹke ee-lije odzu. 
Ọ bụ l'ẹke ono b'e liru Ébirihamu yẹle nyee ya; mbụ Séra; bụru l'ẹke ono b'e liru Áyizaku yẹle nyee ya; mbụ Ribéka; bụkwaruphu l'ẹke ono bẹ ya liru Lii. 
Alị ono yẹle ọgba ono, nọ iya nụ ono b'a zụru ndu Hetu.” 
Jékọpu eketsuaru ụnwu iya ekpe ono; chịru ọkpa dobe l'oshi azẹe ya; tụ-bua ume; lakfushia ndiche iya phẹ. 
