﻿Dagiti Salmo.
128.
Nagasat ti tunggal maysa a mangdaydayaw kenni Yahweh, nga agbibiag kadagiti wagasna. 
Aniaman nga ipaay dagiti imam, pagragsakkamto; mabendisionan ken rumang-aykanto. 
Maiyarigto ti asawam iti nabunga nga ubas iti pagtaengam; maiyarigto dagiti annakmo iti olibo bayat nga agtugtugawda iti aglawlaw ti lamisaanmo. 
Wen, pudno unay, a nagasat ti tao a mangdaydayaw kenni Yahweh. 
Bendisionannaka koma ni Yahweh manipud Sion; makitam koma ti panagrang-ay ti Jerusalem iti amin nga aldaw iti biagmo. 
Agbiagka pay koma tapno makitam dagiti annak dagiti annakmo. Adda koma iti kappia iti Israel. 
