﻿Dagiti Salmo.
122.
Naragsakanak idi kinunada kaniak, “Mapantayo iti balay ni Yahweh.” 
Agtaktakder dagiti sakami iti uneg dagiti ruanganmo, O Jerusalem. 
Naibangon ti Jerusalem a kas iti siudad a sangsangkamaysa a nagi-innasideg. 
Simmang-at dagiti tribu sadiay, dagiti tribu ni Yahweh, a kas linteg iti Israel nga agyaman iti nagan ni Yahweh. 
Nakatugaw kadagiti trono sadiay dagiti mangidadaulo, tapno mangngeddeng iti sangkabalayan ni David. 
Ikararagyo ti kappia ti Jerusalem! Rumang-ay dagiti agayat kenka. 
Adda koma iti kappia iti uneg dagiti padermo ken kinarang-ay iti uneg dagiti torem. 
Gapu kadagiti kakabsat ken kakaduak, ibagak ita, “Adda koma iti kappia iti kaunggam.” 
Gapu iti balay ni Yahweh a Diostayo, ikararagko iti pagimbagam. 
