﻿Dagiti Salmo.
120.
Iti pakarigatak immawagak kenni Yahweh, ket sinungbatannak. 
Ispalem ti biagko, O Yahweh, kadagiti agul-ulbod kadagiti bibigda ken mangal-allilaw kadagiti dilada. 
Anianto ti panangdusana kadakayo, ken anianto pay ngata ti aramidenna kadakayo, dakayo nga addaan iti naulbod a dila? 
Panaennakayonto iti natirad a pana ti mannakigubat, a napanday manipud iti dumardarang a beggang iti enebro. 
Asiak pay gapu ta nagnaedak iti apagbiit idiay Mesek; nagnaedak idi kadagiti tolda ti Kedar. 
Ta nabayag a nakipagnaedak kadagiti manggur-gura iti kapia. 
Kayatko ti kapia, ngem no agsaoak, gubat ti kayatda. 
