﻿Dagiti Salmo.
63.
O Dios, sika iti Diosko! Sipapasnekak a mangsapsapul kenka, kawawnaka ti kararuak, ken tarigagayannaka ti lasagko, iti namaga ken iti natikag a daga nga awan ti danumna. 
Isu a kinitaka iti santuariom tapno kitaek ti pannakabalin ken dayagmo. 
Gapu ta iti kinapudnom iti tulagmo ket nasaysayaat ngem iti biag, idaydayawnaka dagiti bibigko. 
Agyamanakto kenka bayat nga agbibiagak; itag-aykonto dagiti imak iti panagkararagko. 
Kaslaak la nangan iti pata ken taba; idaydayawnaka iti ngiwatko nga addaan ragsak dagiti bibigko. 
No panpanunotenka iti iddak ken ut-utobenka iti agpatpatnag. 
Ta nagbalinka a katulongak, ken agkantaak a siraragsak iti salinong dagiti payyakmo. 
Kumpetak kenka; sarsarapaennak ti makannawan nga imam. 
Ngem maipababanto iti kababaan a paset ti daga dagiti agpanggep a mangdadael iti biagko. 
Maipaimadanto iti pannakabalin ti kampilan, ken agbalindanto a taraon dagiti narungsot nga aso. 
Ngem agrag-o ti ari gapu iti inaramid ti Dios; ipannakkelto isuna dagiti amin nga agkarkari kenkuana, ngem mapasardeng dagiti ngiwat dagiti agul-ulbod. 
