﻿Dagiti Salmo.
54.
Isalakannak, O Dios, babaen iti naganmo ket usigennak iti pannakabalinmo, 
Denggem ti kararagko, O Dios; denggem dagiti sao ti ngiwatko. 
Ta darupendak dagiti natangsit a tattao, ken sinapul dagiti awanan asi a tattao ti biagko; saanda nga impangag ti Dios iti sangoananda. Selah 
Kitaem, ti Dios ti katulongak, ti Apo ti mangsaranay kaniak. 
Supapakannanto ti dakes dagiti kabusorko; babaen iti kinapudnom, dadaelem ida! 
Siraragsakakto a mangipaay iti datonko kenka; agyamanakto iti naganmo, O Yahweh, ta naimbagka. 
Ta inispalnak kadagiti amin a parikutko; nakitak ti balligi kadagiti kabusorko. 
