﻿Dagiti Salmo.
29.
Bigbigenyo a ni Yahweh - dakayo nga annak ti nabileg - bigbigenyo nga addaan ni Yahweh iti dayag ken pannakabalin! 
Itedyo kenni Yahweh ti dayaw a maikari iti naganna; idaydayawyo ni Yahweh iti kawes a mayannatup iti kinasantona. 
Mangngeg ti timek ni Yahweh iti rabaw dagiti dandanum; aggurruod ti dayag ti Dios, aggurruod ni Yahweh iti rabaw dagiti adu a danum. 
Mannakabalin ti timek ni Yahweh; naindaklan ti timek ni Yahweh. 
Tukkolen ti timek ni Yahweh dagiti sedro; Tukku-tukkolen ni Yahweh dagiti sedro ti Libano. 
Paglagtoenna ti Libano a kasla urbon a baka ken ti Hermon a kasla urbon a toro. 
Dumarup ti timek ni Yahweh a mapakuyogan iti gumilgil-ayab nga apuy. 
Gun-gunen ti timek ni Yahweh ti let-ang; gun-gunen ni Yahweh ti let-ang ti Kades. 
Pagsikalen ti timek ni Yahweh ti kabaian nga ugsa; labusanna dagiti kakaykaywan; ngem iti templona kuna ti tunggal maysa, “Nadayag ti Dios!” 
Agturay ni Yahweh a kas ari iti layus; agturay ni Yahweh a kas ari iti agnanayon. 
Mangmangted ni Yahweh iti pigsa kadagiti tattaona; benbendisionan ni Yahweh dagiti tattaona iti kapia. 
