﻿Psalms.
113.
Daydayaw tayu hi Apu Dios! Em, hi-gayuddan bega-en tu ey daydayaw yu hu ngadan tu. 
Kayyaggud hedin medaydayaw hu ngadan tun ingganah. 
Hi-gayuddan katuutuud kebebbebley, meippalpud kasimmilin aggew ingganah di tuka kelinnugi ey daydayaw yu hu ngadan tu. 
Tep hi-gatu hu Ap-Apu di kebebbebley. Ya dayaw tu ey heni lini-bahan tu hu kabunyan. 
Endin hekey hu an mei-ingngeh ni hi-gatu e Ap-Apu e Dios tayu. Immen di tuka pan-ap-apuid kabunyan, 
nem kamanyu-ung et tuka uh-uhdungi hu kabunyan niya puyek. 
Tuka baddangidda hu nangkewetwet ma-lat eleg ida mannananeng ni mewetwet. 
Tudda kaihha-ad di eta-gey ni saad niya tudda kapambalin ni ap-apuddan tutu-u tu. 
Tuka weddaa hu u-ungngan nebasin bii ma-lat man-an-anlad baley da. Daydayaw tayu hi Apu Dios! 
