﻿Psalms.
113.
Madayaw hi APU DIOS. Dakayun muttatyun APU DIOS, dayawon yuy ngadana. 
Om, dayawon yu ta nangamung. 
Dakayun katagutaguh kabobboble, mipalpuh timilan inggana kalin-oban di algo, dayawon yuh APU DIOS. 
Hiyay AP-APU hi kabobboble tuh luta. Paddungnay lina-uwan di dayaw nay kabunyan. 
Maid di ohan umat ke hiya an AP-APU an Dios taku. Hiya ya dehdih langit hi pun-ap-apuwana, 
mu uh-uhdunganay kabunyan ya luta. 
Pakabbaddangana nadan nawotwot ta adida munnanong hi kinawotwot da. 
Idatana didah natag-en saad ta mumbalin dah aap-apun nadan tataguna. 
Ya idatanah iimbabale nadan adi pakaimbabalet umamlong dah nunhituwan da. Madayaw hi APU DIOS. 
