﻿Psalms.
82.
Hi Apu Dios di huwes nah kaamungan nadan makalin dios. Kananan diday: 
“Itikod yu nan bokon limpiyun punhumalya yu ta adiyu mo pahhigan nadan numbahul. 
Itakdog yu ot ya abuy kalebbengan nadan nawotwot ya mahmok an tatagu. Ya baddangan yu nadan napuh-ig ya nadan nakakkapuy an maid di maat dan mundipendal hi adol da. 
Ihwang yu didah aton nadan gaga-ihon maid di homok dah ibbadan tagu. 
Maid di inila yu ya maid di kabaelan yun mun-awat. Paddungnay wada kayuh tapol. Gapun dakayu ya adi maphod ya adi maandong di ma-ma-at hi kabobboble tuh luta. 
Kanak di ‘Am-in kayu ya dios kayu. Ya imbabale dakayun ha-on an Katagtag-ayan. 
Mu mate kayu damdaman umat nadah tatagu ya aap-apu.’” 
Umina ka, Apu Dios, ta humalyaom am-in di tataguh kabobboble te bagim am-in di pun-ap-apuwan tuh luta. 
