﻿Psalms.
47.
Ditakun am-in an tatagu, dayawon takuh Apu Dios. Mumpalakpak taku gapuh anla taku ya oltoolton takun mungkantah pundayaw takun hiya. 
Hiyay DIOS an Katagtag-ayan. Hiyay matakutan ya maun-unud te hiyay Ap-apun am-in tuh luta. 
Indat nan ditakuy kabaelan an mangapput nadah buhul takuh kabobboble ot ditakuy mun-ap-apu ke dida. 
Ya hiya boy namili nah boblen numboblayan takun holag Israel an ipahhiya takun tatagunan impakappinhod na. 
Hiya an Dios ya manged tap-oh kabunyan yaden muntukuk di tatagu gapuh an-anla da ya pun-ipagango day tangguyub da. Manalakdang hi APU DIOS an e umbun an mun-ap-apu. 
Aga, mungkanta takuh pundayaw takun hiya. Mungkanta takuh pundayaw takun hiya an Patul taku. 
Hiya an Dios di Patul am-in tuh luta. Mungkanta takuh pundayaw takun hiya. 
Hiya ya inumbun nah pun-ap-apuwanan mun-ap-apun am-in hi kabobboble. 
Naamung am-in di aap-apu tuh luta ot mid-um da nadah tatagun mundayaw nah Dios Abraham. Hiyay Patul am-in di papatul di luta. Ya am-in di tatagu ya dayawon da hiya an Dios an Katagtag-ayan. 
