﻿Psalms.
26.
APU DIOS, kalyom an maid di bahul ku te maphod di at-attok. In-ohhak ke he-ay pundinol kun uggeyak nunhalinduwa. 
Patnaanak ta tibom di pangi-ek, hay punnomnom ku ya nadan nganneh diyen pinhod kun aton. 
Te inilak an ongal di pamhod mun ha-on ta nangamung ya nanongnan mangun-unudak ke he-a. 
Adiyak maki-kie nadah tatagun makallangkak ya humahhaul. Ya adiyak makidkid-um hanadah kay makaphod di aton da ya kalyon da yaden deman ot an gaga-ihoy wadah nomnom da. 
Kahingngitak boy gaga-ihon tatagu, kinali adiyak mid-um ke dida. 
APU DIOS, ulahak di taklek ta ipatibok an maid di bahul kut umaliyak nah altar mun 
ikantak di pumpasalamat kun he-a ya kalkalyok di mipanggep nadah makaphod an inainat mu. 
APU DIOS, pakappinhod kun ume nah balem an kitib-an di dayaw mu. 
Adiyak anhan pakidadag nadah naliwat. Ya adim anhan iabulut an maat ke ha-on di umat hi maat nadah pumapatte. 
Gaga-ihoy atoaton da ya mumpabayad da hi pangatan dah gaga-iho. 
Mu adiyak pe athidi te maphod di at-attok. Kinali ihwangak anhan te huhhummok ka. 
Inhamad kuh nomnom kun mangun-unud ke he-a, APU takon di nganney maat ke ha-on. Kinali dayawon daka, APU DIOS nah Templom an kaam-amungan di tatagum. 
