﻿Psalms.
15.
APU DIOS, inilak an hay mabalin an makiha-ad ke he-a nah Templom nah madayaw an bilid mu 
ya nan tagun makangngun-unud hi pinhod mu ya nan limpiyuy atona ya kalyona. 
Hidiyen tagu ya adina kalyon di pama-inah ibbanan tagu, adina aton di gaga-ihoh ibbana ya adina tumtumbukon di hinag-ona. 
Adina ibilang nadan tatagun adi tobalon APU DIOS, mu tobalona nadan makangngun-unud ke hiya. Ya deket waday kinalina ya paannungonan aton, takon di naligat. 
Mumpagawat hin waday pihhuna, mu adina paporsiento. Ya adina abuluton an mabayadan ta e muntistiguh langkak ta kilul-uwan nadan maid di bahul na. Hanan tagun athinay pangi-ena ya munnananong di pakihayyupanan APU DIOS. 
