﻿Job.
14.
Am-in di tagu ya nakakkapuy dan maid di kabaelan da. Antikke ya napnuh ligat di biyag da. 
Umat da nah palawer an man-ut timmagu, mu gagala ya nakleng. Ya umat da nah a-on gagalan mama-id. 
Apu Dios, kon halipat-anak ta idiklamuwak ta kalyom di kastiguk? 
Kon mabalin an waday tagun maid di kihallaana? 
Binilang muy toon ya bulan di pumbiyagan di tagu ya adi mabalin an mad-uman di binilang mu. 
Kinali, daan mo anhan ta bay-am ta mun-iyatuh nakatang? Kay kattog muttatyu, kinali adim halipat-an ta gibbuwonay ngunun indat mun hiya. 
Hay kaiw ya takon di nalngo ya namnamaon an humaping ne himmapang ten immongngal. 
Ya takon di nadunut nan tungod ya humaping di lamut na ten immudan. 
Mu adi athidih tagu te deket nate ya hidiyey poppog di nitaguwanat makal-iwan. 
Athidi boh danum nah wa-el ya lobong an matduk ta mamag-anan. 
Nate ke boy tagu ya kay nahuyop an adi mo bumangun inggana mama-id di kabunyan. 
Mu ha-oy ke pe Apu Dios ya pakudukdulok an deket mateyak ya eyak italu nah dalom di lutat deket nakaan moy boh-ol mu ya himmokak. Ya hana ot ta gutudom di algon pangihwangam ke ha-on. 
Mu kon deket natey tagu ya ahi bo tumagu? Ya deket athidiy maat ya takon di namahig tun punholholtapak ya waday namnamak an mapoppog. 
Ne ayaganak ke he-a ta humumangak ya umamlong kan ha-on an lintum. 
Ta kediye ya halipat-am di gattinok an bokon hay nunliwatak. 
Ya ahim kal-iwan di gaga-ihon inat ku ta ibilangak bon maphod. 
Muden hay kakulugana ya ma-idom di namnaman di tatagu umat hi kagdeyan di bibilid ya kapuligan di o-ongal an batuh dopla ya umat hi kabulubulan di luta gapuh namahig an udan. 
Apputom dida ya pumbalinom an mumbaliw di ang-ang da ten nate da ne impaem dida nah eda kiha-adan ta nangamung. 
Adida inilaon hin madayaw weno mibabain di imbabale da. 
Abunay gibgibbokon day punholholtapan da ya u-umyung da.” 
