﻿Job.
7.
Kon adi tuwali naligat di biyag di tagu? Munholholtap tuwaliy tagu, umat nah muttatyun naligat di nitaguwana. 
Hay tagu ya kay himbut an umabtun mahilong ta mun-iyatu ya umat nah makiboklan hadhad-onay tangdana. 
Ha-oy ke ya u-umyungak hi kabigabigat ya kahilohilong an maid moy namnamak hi nitaguwak. Hituwe pe kattog di indat Apu Dios an biyag ku. 
Deket mahmahhuyopak nah hilong ya uma-abtuwak an mabigat, mu kon ot makabayyag an mabigat yaden bumalibalinak. 
Nabigiyan di adol ku ya mun-aayuy nonan di poghak. 
Hay punggibok ku ya gagalan mangey algok an kay hingkodom ya abu. Ya maid di namnamak an tumagu. 
Apu Dios, adim kal-iwan an kay hap-ud di biyag kut maid anhan di ek mo pun-an-anlaan te dandani moy poppog di biyag ku. 
Man-ud uwani te tibtibbonak, mu gagala ya adiyak mo tibon te mateyak. 
Hay tagu ya umat hi kulabut an deket nama-id ya adi mo mibangngad. Athidiy tagu an deket nate ya adi mo mibangngad ta kal-iwan mon am-in nadan nanginilan hiya. 
Namahig di boh-ol ku ya hakit di nomnom ku kinali mahapul an kumaliyak. Adinadaman ek pamgay op-opya. 
Tipet eyak guguwalyaan ke daka? Kon umatak nah katatakut an matagu nah baybay? 
Deket nibakilangak ta mahuyopak ta ihamak kuy kaalubyagan di hakit di nomnom ku 
ya tanaktakutonak ke he-a nah ipain-inop mun ha-on. Te dakol di patibom ke ha-on hi katatakut ya lomamonak ke he-a. 
Ta hidiyey gapunan pakudukdulok an hoklonak ta mateyak mu nan eyak tumagun munholholtap. 
Abu ot kattog di mumbiyag, immingleyak mo anhan hi nitaguwak. Kinali bay-anak pet nangamungak. Maid metlaing di hilbin di biyag ku. 
Kon tipet importantey tagu ke he-a, Apu Dios? Tipet pakaikkagum di at-atton di tagu? 
Kabigabigat ya halipat-am di at-attona on indatam hi punligatanat pamatnam ke hiya. 
Ha-oy ke, daan mot bay-ananak pe ta nangamungak? 
Nganney inat kun he-a, Apu Dios? Kon numbahulak ke he-an manguh-uhdung hi tagu? Tipet ha-oy di pinilim an punholholtapon? Kon ha-oy di umidat hi kabulubulunam? 
Kon adiyak anhan pakawanan hi liwat ku? Gagala pe tuwali ya milubukak ta deket eyak hamakon ke he-a ya maidak mo.” 
