﻿Micah.
1.
Ha"in an hi Micah an iMoresheth hidin nahayhaynod hi nun'alian da Jotham, ya hi Ahaz, ya hi Hezekiah hidid Judah ya umat hituy hinapit Apo Dios ay ha"in hi aat di ma'at ad Samaria ya ad Jerusalem. At inali' di, 
“Donglonyun amin an tatagu, ya ihamadyun ingaon ti nan nidugah di abalinanan Dios an wah nan me'gonan an Timplunay mangihtiguh nan baholyu.” 
Ya inali' goh di, “Tigonyu an umalih Apo Dios an taynana nan me'gonan an awadanad abuniyan ta mundadyu an e'wanah nan tulid di atata'nang an duntug. 
Ya paddungnay mun'a'anang nan aduntuduntug an umat hinan lilin hi un meheggon hinan apuy, ya numpanga'ayuhda an umat hinan danum an nihiit hinan daplah, ya nan nundodottal ya munhiyan ta munduwa. 
Ya ma'at hanan amin ti dumalat nan numbaholan nan holag Israel ya nan nan'ugandan Apo Dios. At hay ma'amuyuan hinan numbaholan nan holag Israel? Undan bo'on nan tatagud Samaria an kapitulyuda? Ya hay awadan nan nabagtun nundayawan nan tatagud Judah hinan bululda? Undan bo'on ad Jerusalem an kapitulyuda? 
At hiyanan inalin Apo Dios di, Ha"in an Dios ya pa"io' ad Samaria ta mumbalin hi galden an puntamman hi greyp, ya pumpulig'u nan batuh nan nundotal ta mun'abunhiyan nan nipabunana. 
Ya an amin nan bululda ya mun'agimu', ya an amin di nipa'daw hinan timpluda ya mun'apuulan. Ti hanan adawda an innalda ya un hay nalpuh bayad di puta, ya hana goh an bayad nan puta ya hiya goh di ma'usal.” 
Ya inali' goh an hi Micah di, “Hiyanay dumalat ya numanomnoma' ya dumanaldallanana' an mi'id di hapatus'u ya numbobollada'. Ya kumilaa' an umata' hinan animal an jakal, ya mumpala'a' an umata' hinan kuup. 
Ti paddungnay himmalom nan hugat di tatagud Samaria an adi ahan ma'agahan, ya umat goh hinay ma'at ad Judah, ya ta"on goh ad Jerusalem an kapitulyu an numpunhituwan nan tatagu'. 
Ya adiyu ibabbaag hinan buhulyun tatagud Gath nan na'abakan tu'u, ya adiyu ipattig di kumilaanyuh nan i'Acco, mu mumpulligan ayuh nan hupu' an tatagud Beth Ophrah ta ipattigyuy punlungdayaanyu. 
Ya da'yun tatagud Shaphir ya maluh ayu an numbobollad ya ababain di aatyu, ya mi'id ah pumitaw hinan himpangilih nan babluy ad Zaanan. Ya awniat donglonyu nan ahi'e'ebel ad Beth Ezel ti nan bumaliw ya nekak ay da'yu. 
Ya nan tatagud Maroth ya hehemmonday abaliwandah nan aton di buhulda, mu umod'o'od'odda ti mi'id bumadang ay dida ti inyabulut Apo Dios nan apa"ianda an magadyuh hinan babluy ad Jerusalem. 
Ya da'yun tatagun numpunhitud Lachish ya punnaudonyun pun'ipaku nan kabayuyuh nan kalesan di punluganan di mi'gubat ta lumayaw ayu. Ti da'yuy nahhun an nangitudtuduh nan numbaholan nan tatagud Zion, ya inyunnudyuh nan inat di tatagud Israel an gunda numbahol ti gunda nundayaw hi bulul. 
At hiyanan da'yun tatagud Jerusalem ya idatyuy adawyun da'min iMoresheth Gath hinan ay tu'u punhihiyanan ti abakon da'mi mahkay hi buhul, ya inyuy da'mih udum an babluy. Ti mi'id di hohoddon nan ali tu'un holag Israel hi badang nan i'Aczib ti ilayahanda hiya.” 
Ya inalin goh Apo Dios di, “Ipa'abak da'yun iMareshah hinan buhulyu ta hakuponday babluyyu, at nan a'ap'apuyun holag Israel ya umuyda mun'ipo"oy hinan lingab hi ad Adullam. 
At da'yun Hudyu ya mumpamukmuk ayu ta hiyay mangipa'innilah nan punlungdayaanyu ti iyuyda nan imbabaluyuh udum an babluy. At mi'id mahkay tigonyun dida.” 
