﻿Lamentations.
3.
Ha"in nan tagun namadah hi ligat an gapuh bungot Apo Dios 
ti inyuya' hinan pa'ahhelong ta impadalana' hidi, 
ya gunna' pinaligligat hi a'alga'algaw. 
Ya paddungnay nun'aphit di lamoh'u, ya nun'a'ipung di tungal'u. 
At nidugah di ha'it di nomnom'uh nan nunholholtapa' 
an paddungnay inhinaa' ay Hiyah nan munhehellong an lubu' din nun'a'atoy hidin penghana. 
Ya mi'id goh udot di ato' an lumayaw ti binangkilingana', 
ya ta"on hi unna' numpahpahmo' ay Apo Dios mu agguyna dengngol din inluwalu'. 
Ya paddungnay hinawananah natpeng an batu nan owo' ta maligatana' ahan an dumalan. 
At hay punle'na' ay Apo Dios ya paddungnay layon unu bear an nipo"oy hinan dalan ta bota'ona'. 
At hene'mata' hinan dalan, ya ginuyuguyuda' an inyuy hi adagwi ta nunggudunay odol'u ya unna' taynan ay Hiya. 
Ya hay oha goh hi inatna ya paddungnay immali ta indodongdongnan ha"in di nalad an panana. 
Ya numpanaa' ta numpangahalom hi odol'u, 
at inaba'abatlana' hinan tatagu, ya gunda ingkankantay pamihuldan ha"in. 
Pinaligata' ahan ay Apo Dios an paddungnay impa'inumana' hinan nidugah an mun'aklit. 
Ya paddungna goh di inggatina' ta nihubuhuba' hinan pito', ya intemoga' hinan batu ta nun'a'aan di baba'. 
At dumalat ay daten na'at ay ha"in ya mi'id mahkay di poto' di nomnom'u an mi'id di inila' hi aat di amlong. 
At alyo' di, “Mi'id ahan di abalina', ya adi' mahkay namnamaon di badang Apo Dios ay ha"in!” 
Ya wa ay ta nomnomo' nan nunligligata' ya nan niyadagwia' hinan ni'babluya' ya munha'it ahan di punnomnoma' 
ti nomnomnomo' ay daten na'at ya nidugah an mangluya'. 
Mu himmungdu ay nan maphod an punnomnom'u ya wada damdamay namnama' ay Apo Dios. 
Ti nan nidugah di pamhodna ya munnononnong an adi malumluman, ya mi'id di pogpog di homo'na 
an paddungnay baluh abigabigat. At mundenola' hinan anahamadna an adi mabalin hi maluman. 
At hay ninomnom'u ya alyo' di, “Hi Apo Dios ya anggay di mahapul'u, at Hiya ya anggay di ehdol'u!” 
Hi Apo Dios ya ma'ulay hinan mange'kod ay Hiya, ya Hiya ya anggay di dayawonda. 
At hay maphod ya way ohaan mahapul an anuhanan munhood hinan pamaliwan Apo Dios ay ditu'u. 
Ya ma"aphod hi un way ohaan impa'enghanan mangedpol hi ligat an ete"anah a'ungana. 
At wa ay ta waday ligat ya inila tu'un mangedpol an nonong ya didindinong tu'u, ya inyokod tu'un Apo Dios. 
Ti hi Apo Dios ay di pangiyokodan hinan ligat tu'u ya badangan ditu'u. 
At ta"on hi un ditu'u ipaligligat hinan buhul ta tapa'on ditu'u mu olom ya mabainanda ahan. 
At hi Apo Dios ya ongol di homo'na an adi ditu'u inganuy hi enggana, 
ya ta"on hi unna iyabulut di punligatan tu'u mu hom'on ditu'u damdama an miyunnudan hinan ongol an pamhodna an adi malumluman. 
Ti adi pun'amlongan Apo Dios di ay tu'u ipaligligatan unu numanomnoman. 
Ti undan agguyna inilay aat di nunligatan tu'uh din na'abakan tu'u ta numbalinon ditu'uh himbut hi udum an babluy? 
Ti hi Apo Dios an na'abbagtu ya inilana an layah nan lebbengna tuwalin ma'at ay ditu'u, 
ya i'innilana goh an layah di pamanuhdah nan ohan tagu. 
Ti anggay hi Apo Dios hi mangiyabulut hinan pohdonah ma'at 
ti mabalin an ipa'at Apo Dios an na'abbagbagtu nan maphod ya nan adi maphod. 
Mu anaad ta munlili tu'u ya wan na'at hana ay ditu'un gapuh nan numbaholan tu'u? 
At mahapul an hamadon tu'uy aat tu'u ta muntutuyu tu'u ya numbangngad tu'un Apo Dios. 
Ti Hiya an wad abuniyan ya titiggon ditu'u, at hiyanan mahapul an iyokod tu'un amin di nitaguan tu'un Hiya an alyon tu'uy, 
“Numbahol ami ahan ay He"a, ya nginohoymi He"a, at hiyanan agguymu inaliwan di baholmi! 
At gapuh bungotmu ya paddungnay inunud da'mih nan immayanmi ta pumpatoy da'min mi'id ah homo'mu. 
Ya paddungnay nihani'ah nan ma'ugtul an bunut ta adi dumatong nan luwalumin He"a. 
Ya inyabulutmu an hay pannig di Hentil hi udum an babluy ay da'mi ya ay ami galut an mi'id di hulbimi! 
Ya pinadngopadngolan ya binaibain da'mih nan buhulmi, 
ya nidugah di wumogwoganmin dumalat di ta'otmih nan inyammadan namituda ya nan nama"iandan da'mi. 
At ha"in ay ya nidugah di lugwa' an paddungnay wangwang an umayu'ayuh an dumalat din nun'a'ubahan nan ibba' an iJudah. 
At namaagan limmugwalugwaa' an mi'id ah duminngana 
ta engganah unna' hemmo' ay Apo Dios. At Hiya nongkay ya tigon da'mi, ya hom'on da'mi. 
Mu tigo' ay nan inat nan buhulmih nan tatagud Jerusalem ya nidugah an numanomnoma'! 
Ya paddungnay unna' hamutin nunhu'u' nan buhul'u an ta"on hi un mi'id di dimmalat. 
Ya penhoddan mamatoy ay ha"in ta uhbungona' hinan bitu, ya nun'uhunana' hi batu. 
Ya he'ne'noba' hi danum, at hay ninomnom'u ya hiyay apogpoga'.” 
Mu nunluwalua' ay Apo Dios ta badangana' hi awada' hi bunol nan bitu. 
At dengngolmu, Apo Dios, din numpabadanga' hidin nangalya' hi, “Donglom ni' ahan nan pumpahmo'a'!” 
Ya inabulutmu din imbaga', ya inalim ay ha"in di, “Adi'a tuma'ot!” 
At immannung an binadangana' ay Apo Dios, ya binaliwana' ta agguya' natoy. 
Ya inali' ay Apo Dios di, “Inilam, Apu, nan adi maphod an nangatdan da'mi, at He"a ni' di mangiballoh ta humalyaom dida! 
Ya i'innilam goh nan nidugah an boholda ya an amin nan ninomnomdan adi maphod an aton ay ha"in. 
Ya dengngolmu nongkay din namadngopadngolandan ha"in ya an amin din ninomnomdan adi maphod an aton ay ha"in 
an gunna' inulgu'ulgud ay didan buhul'uh abigabigat. 
Ya undan adim tigon an ta"on un hinan um'umbunanda unu tuma'ta'doganda ya gunda ikankantay pamahiwdan ha"in? 
Uggoh mah ta paligatom kogoh dida, Apo Dios, ta miyunnudan hinan adi maphod an inatdan da'mi! 
At punheglaom ay ni' di punligatanda, 
ya numpudugmu ay ni' dida an dumalat nan nidugah an bungotmu ta pumpatoymu dida!” 
