﻿Isaiah.
32.
Nomnomnomonyu an udum di algaw ya waday umalin mun'ali an nahamad di pangatna, ya umat goh hinah nan bumadang ay Hiyan mun'ap'apu an nahamad di pamanuhdah nan tatagu. 
Ti hinohha ay dida ya umatdah nan nahamad an ihi'ugan hi un way puo', ya umatda goh hinan danum hinan ginnaw hinan mapulun ya hinan naliduman an puun di ongol an batuh un nidugah di potang. 
Ya paddungnay madiat mahkay di matan nan tatagun Apo Dios, ya pohdondan donglon di hapitona. 
Ya adi mahkay malgom di atonda ti pa'annomnomonda ta nahamad di pangatda, ya nan nepto' goh di hapitonda. 
Ya bo'on mahkay nan manamanangpah di ma'alih nahamad an tagu unu nan immadang an dumalat di nun'appuhin pangatday e'gonan di tatagu. 
Ti nan manangpah ya mid upid hi hapitonda, ya nappuhiy nonomnomonda ya pangatda. Ya layah ahan di gunda ibagabagah nan tataguh aat Apo Dios, ya adida ahan bumadang hinan tatagun ma'ahinnaang an dumalat hi ami'mi'idanda. 
Ya nan adi mangngol ya nun'appuhiy pangatda ti gunda punlayahon nan nun'awotwot an ta"on hi un makulug di atondan mumpahpahmo'. 
Mu nan nanomnoman an tagu ya nahamad di pangatna, ya ta"on un nan nomnomnomonan aton ti nan makulug di ihtiguana. 
At da'yun i'ibba' an binabain waday pangngalana an mi'id di pun'od'odanah mahapulna ya donglonyu tun ibaga'! 
Ti manud ugwan ti maphomaphod di nitaguanyu an mi'id di numanomnomanyu, mu awni ta maluh di nahuluk hi hintawon at nidugah di numanomnomanyu ti mi'id di ma'alayuh nan bungan di intanomyun greyp ya nan udum an bungbungaan. 
At i'ibba' an binabain waday pangngalanan mi'id di pun'od'odanah mahapulnad ugwan ya awniat madatngan di wumogwoganyuh ta'otyu! At odolnah unyu punluh'up nan mun'aphod an inlubungyu ta mumpunlubung ayuh langgut ta ipattigyuy punlungdayaanyu. 
Ya nun'ug'ugyuy palagpagyuh punha'itan di nomnomyuh apa"ian nan papayawyu ya nan puntammanyuh greyp. 
Tun babluy tu'ud Jerusalem ya mapa"i, at mumpangahangaw di pagat ya pagal. Immannung an lugwaanyuy apa"ian nan pun'am'amlonganyun a'abung 
ya nan palasyu, ya an amin di wah tun babluy tu'un mamapnuh din hopanah tatagu ya mabukawan. At mumbalin hi ihinan di dongki ya kalnilu 
ta engganah un honogon Apo Dios nan Na'abuniyanan an Lennawan ditu'u, at lumumong nan mapulun, ya pumhod di mihabal ta umatdah nan a'ayiw hi inalahan! 
Ya nahamad di pangat nan i'ibba tu'un mangipanuh hi tatagu ta pumhod tun babluy tu'u ti nahamad di pangat di hinohhan ditu'u. 
Ya gapu nongkay hinan nahamad an pangatda ya malenggop mahkay tun babluy tu'uh enggana. 
Ti inalin goh Apo Dios di, “Nan tatagu' ya malenggopda mahkay hinan numpunhituwandan mi'id di ita'otda. 
At ta"on hi un pa"ion di o"ongol an dalallu nan bubulung ya nan babluy hidi 
mu wagaha' damdama dida. At an amin di ihabalda ya mumpangabungada, ya umat goh an do'ol di onon di bakada ya dongkida.” 
