﻿Isaiah.
10.
Mahmo' ayun gun mangiyammah nan nibahhaw an uldin an mangipaligligat hi udum an tatagu. 
Ti inubahyuy biyang di nun'awotwot, ya nun'abalu, ya nun'anguhu ta mabalin an kulukonyu dida. 
At hay atonyuh un madatngan di pummoltaan Apo Dios ay ditu'u ti pa'alionay mangubat ay ditu'un malpudah adadagwin babluy? Ya hitun a'atana ya hay pumpabadanganyu mahkay? Ya hay pangiyayanyuh inadangyanyu? 
Ti hay ma'at ya adi tu'u ay matoy hi gubat ya iyuy ditu'uh nan buhul tu'uh udum an babluy. Mu ta"on hi un umat hina ya adi damdama ma'udyaan di bungot Apo Dios ay ditu'u, at hiyanan inaynayuna damdaman mummoltan ditu'u. 
Ya inalin Apo Dios di, “Mahmo'da nan i'Assyria ti dida nan umat hi haplat an panaplat'uh nan tatagu' an gun mangipabungot ay Ha"in. 
Ti hanan i'Assyria di honogo' hi mangipaligligat ay da'yun tatagun nan'ug ay Ha"in. At pun'aladan amin di gina'uyu, ya nun'igatin da'yun dida ta umat ayuh pito' hinan kalata. 
Mu nan alid Assyria ya agguyna inilah un Ha"in di nannag ay hiya ti hay ninomnomna ya unna tuwali pohdon an pogpogon di do'ol an babluy. 
Ya mumpahiyan alyonay, Adi madnoy mahkay at way ohah tun u'upihyal'u ya mepongdan mun'alih nan babluy an inabak'u! 
Ti inabakmid Calno, ya ad Carchemish, ya ad Hamath, ya ad Arpad, ya ad Samaria, ya ad Damascus. 
Inabakmi danen babluy an mumpundayaw hinan do'ol an abulubulul ya un nan dayawon di iJerusalem ya iSamaria. 
At namama ahan di ma'at hi ad Jerusalem ya nan dayawonda ta umat hinan inatmid Samaria ya nan bulul an gunda dayawon. 
Mu Ha"in an Dios ya ninomnom'un malpah ay an amin nan ato' hi ad Judah an namamah nan Duntug an Zion ya minolta' mahkay nan alid Assyria ti nidugah di pumpahiyaana ya amahapitna. 
Ti inalinay, Manu ay nangab'abaka' hi gubat ya gapuh nan abalina' ya la'eng'u! At do'ol mahkay di babluy hi inubah'uy igad di babluyda ta nun'ala' di inadangyanda, At umata' hi manilhig an bakan nun'igatin'uy a'ali! 
At nun'ala' di inadangyan di tataguh abablubabluy an umat hi inat'un nangngal hi itlog di hamutin tinaynan inanah nan numbuyaana, at mi'id di namadah hi nangiyadi.” 
Ya inalin goh Apo Dios di, “Umat hinay hinapitna mu undan mabalin an nan wahay ya nidugdugah di abalinana ya un nan manglon? Ya undan goh nabagbagtu nan lagadi ya nan munlagadi? Ya nan huplit ya adi nonongan nihuplit hi un mi'id di ngamay hi mangdon, ya umat goh hinan hul'ud an adi nonongan immuy. 
At hiyanan Ha"in an nidugah di abalinana ya ipa'ali' di nidugah hi dogoh ta pummolta' hinan mun'abi'ah an titindalun i'Assyria. At nidugah an hay punle'nada ya ay na'apuyan di odolda. 
Ti Ha"in an ma'alih dilag di ad Israel ya mipaddung goh hinan mundalang an apuy ta pogpogo' dida. At nan i'Assyria an umat hi hubit ya himbumaggay aghobanda. 
At daten umat hi ma"aphod an inalahan ya payaw an titindalun i'Assyria ya pogpogo' dida ta umat hi pama"ian di dogoh hi odol di tagu. 
At un tuttulu ya anggay di ma'angang, at ta"on un nan ung'ungnga ya abalinanan bilangon dida.” 
Hay umangunuh ya nan ma'angang ay da'min holag Israel ya hi Apo Dios mahkay an madayaw tuwalid Israel di nahamad hi pangiyokodanda an bo'on nan mamatoy ay dida. 
Mu unda tuttuluy mumbangngad hinan holag Jacob an mangun'unud hinan nidugah di abalinanan Dios. 
Ya ta"on hi unda do'ol ahan di holag Israel an umat hi ado'ol di panag hinan pingit di baybay mu unda nahnot di mumbangngad. Nan udum ay dida ya mapogpogda ti hiyah ne tuwali ma'at ay dida. 
At ipa'annung Apo Dios an nidugah di abalinanay hinapitnan apogpogan nan tataguna. 
At hi Apo Dios an nidugah di abalinana ya inalinay, “Da'yun tatagu' an iJudah ya adi ayu tuma'ot hinan i'Assyria hi un da'yu paligligaton an umat hidin inat nan i'Egypt ay da'yu. 
Ti heten pummolta' ay da'yu ya adi madnoy at mapogpog ta diday pogpogo'.” 
At hi Apo Dios an nidugah di abalinana ya moltaona dida ta umat hi nummoltaanah nan iMidian hinan Batud Oreb, ya umat goh hidin nummoltaanah nan titindalud Egypt ta nun'alnongdah nan baybay. 
Ya bo'on mahkay diday mun'ap'apuh nan babluyyu ti mapogpog nongkay nan gunda pangipaligligatan ay da'yu. 
Amangonyu adya nan buhulyun i'Assyria an na'uydan gumubat! At henggopda mahkay ad Aiath, ya ene'wadad Migron, ya ad Micmash ya inhinadah di nan udum an gina'udan mi'gubat. 
Ya nunti'idda ta linauhanda nan bihhang ta immuyda immiyan ad Geba. At tuma'otda nan i'ibba tu'ud Ramah, ya limmayawda nan wad Gibeah an babluy din ali tu'un hi Saul. 
Ya pinumkawda nan i'ibba tu'ud Gallim hi ta'otda, ya mahmo'da goh nan wad Laishah ya ad Anathoth. 
Ya numpangalayawda goh nan wad Madmenah, ya ad Gebim, 
mu ad ugwan an algaw ya dimminongda nan buhul hi ad Nob ta mun'eblayda. Mu umi'ikayda damdaman umalin mama"ih tun ad Zion. 
Mu tigonyun hi Apo Dios an nidugah di abalinana ya nidugah di pangatnah nan titindalun i'Assyria an ta"on hi un nan ap'apuda ya u'upihyalda. At paddungnay punlongohnay o"ongol an ayiw. 
At nan nidugah di abalinanan Dios nongkay ya pogpogona daden buhul tu'un holag Israel, at umat hinan munlongoh hi ayiw hinan inalahan ad Lebanon. 
