﻿Song of Songs.
1.
Hiyah te nan ma"aphod ahan an kantan intudo' nan Alin hi Solomon. 
“Ungngu'ungnguona' ay he"a ti nan pamhodmu ya nidugah an munlameeh ya un nan bayah. 
Ya na'abbanglu ahan di hunghungmu, ya mabugwa ay di ngadanmu ya umat hinan hunghung di nihiit an bangbanglu. At hiyaat un an amin nan babalahang ya pa'appohpohdon da'a! 
At itnuda' ay he"a ta padutu'antan lumayaw. At initnuda' hinan pa'appohpohdo' hinan kuwaltuna.” Hay Ingkantan nan Liligwan nan Lala'i: “Umipa'amlong'a ay da'mi ti onayna nan pamhodmuh nan engham ya un nan amaphod di bayah!” Hay Ingkantan nan Babai: “Immannung an ma"aphod hi un nan babalahang ya ipa'amlong da'a an lala'i! 
Mu da'yun binabaid Jerusalem ya ma"apgohana' an ta"on hi unna' mangmangitit an umat hinan tuldan nan holag Kedar, mu ma"apgohana' nongkay an umat hinan kolol di ma"aphod an kultinan di abung Solomon. 
At adia' toto'lon an dumalat nan amangmangitit'u ti unna' impangitit hinan potang ti nan a'agi' an linala'i ya abohlana', at nuntamuona' hinan nitamman di greyp. At hiyanan ninganuy tun odol'u. 
He"an engha' ya ibaagmu ni' ay ha"in di wadan nan pangipahtulam hi kalnilum, ya hay wadan di pangihi'ugam hi pun'eblayandah nan tongan di algaw, ya ibaagmu ni' di wadam ti adi' pohdon an alyonday unna' putah nan pangana'anapa' ay he"ah nan wadan di i'ibbam an mumpumpahtul.” 
“Gulat ta mi'id di inilam hinan lugal an he"an ma"apgohan an babai ya unudom nan do'ol an gatin nan kalnilu ta hidiy pangipahtulam hinan gandengmuh nan neheggon hi allung an iliduman nan mumpumpahtul. 
He"an engha', umat'ah nan ma"aphod an obay an kabayun manguyud hinan kalesan nan alid Egypt, 
ti nan angahmu ya ma"aphod di tigawna an medeggop nan hingatmu, ya ma"aphod di tigaw nan bagangmu an nabuungan hinan nanginan buung! 
At ipiyamma' di balitu' hi hingatmu an ma'al'altian hi silver.” 
“Hidin ali'li'uham an ali' ya hinunghungmu nan bangbanglu'. 
Ya umat goh hina ay he"a an umat'ah myrrh an maphod di hunghungna an nibi'lug hinan imbuung'u. 
Ya mipaddung'a goh an engha' hinan nalammung an habhabung an maphod di hunghungna an numpangahaw hinan nitamman di greyp ad En Gedi.” 
“Ma"apgohan'a ahan an engha', ya ma'amnawan'a ahan an inyal'allanah nan matam!” 
“Ma"aphod goh di alala'im an he"an engha', ya umipa'amnaw'a ahan. Ya nan muymuyammi ahan an holo' di olo'antah udum di algaw!” 
“Nan cedar an ayiw di oleng nan abungta, ya nan bolbol di anahalna.” 
