﻿Proverbs.
27.
Adim iyamlong di ninomnommuh atom hi ma'et ti agguymu inilay ma'at ay he"an den algaw. 
Maphod hi un hay udumnan taguy mangul'ulgud hi aat di amaphod nan pangatmu ti adi ahan maphod hi un he"ay mangat. 
Immannung an naligat di mumpi'ug hi batu ya panag ti mun'adamotda, mu inyal'allanan naligat di pange'edpolan hinan gumuluguluwan di nakudang di nomnomna. 
Naligat an medpol di bungot, mu iyal'allanan naligat an medpol di amoh. 
Od'odolnah un way tagun mangihingal hi ibbanah unna aton di nappuhi ya un nan tagun way pamhodnan hiya, mu adina ahan ipattig. 
Ta"on un'a mah'itan an dumalat di pangihingalan nan i'ibbam ay he"a ti ma"aphod di umat hina ya un nan ato'aton nan pi'bohholmun mangungngun he"a. 
Na"abhug ay nan tagu ya ta"on un nan danum di alig ya adina pohdon an tamtaman, mu nan nahinaangan ya ta"on un nan mumpait an ma'an ya mapolhat di panamtamna. 
Nan tagun manaynan an umadagwih nan nunhituwana ya umat hinan hamutin manaynan hinan agabana, ya immuy an tumanaytadyapan an lumane'le'od. 
Immannung an umipa'amlong nan panugun di nahamad an ligwa an umat hinan numbino'ob'on an bangbanglu an umipa'amlong goh hinan mangusal. 
Adim inganuy nan liligwam ya nan liligwan nan o'ommodmu ti wa ay ta mumpabadang'a ya diday madadawoh hi ag'agan bumadang ya un nan tutulangmun wah nan adagwin babluy. 
He"an imbaluy'un lala'i, umipadenol ay ha"in hi un'a luma'eng ta manomnoman'a, at ta"ongkay hi un way mamihul ay ha"in ti nan maphod an ugalim di mangitudun hiyah aat'un nahamad. 
Nan tagun nanomnoman ya immatunanah un waday nappuhin ma'at ay hiya, at halimunanay odolna ta adi ahan ma'at, mu nan tagun nawongwong ya unnaat goh ay damuwon nan nappuhi ta hegnona mu awni ta umangunuh at muntutuyu mahkay ti maligatan. 
Mahapul an waday alanyuh gina'un nan tagun mangita'dog hinan tagun umutang ta pamatangna, ya iyal'allanah unyu agguy in'innilah nen tagu. 
Gulat ta unmu ibugaw di pangapngaam hinan heneggonmuh nan pa'ahhelhelong at mid mapto' ya alyonaan unmu hiya idutan! 
Nan babain gun mi'hongngel hi ahawana ya umat hinan danum hi lawang an tumidtitidtid an umipahiga. 
Ti ta"on hi un gun ipadah nan lakaynan ipadinong hiya mu adi mabalin ti umat hinan tuyup an adi mabalin hi mipadinong, unu umat hinan lanan adi mabalin an magamal. 
Nan kelkel ya mabalin an kelkelona nan ibbanan gumo' ta tumadom, ya umat goh hinan tagun hay ibbanah taguy pun'adalana ta luma'eng. 
Nan tagun manalimun hinan nitanom an fig ya immannung an malagbuan ti ononay bungana, ya malagbuan goh nan baal an manalimun hinan gina'un di apuna ti e'gonan nan apuna hiya. 
Nan mapaganah an danum ya umat hinan halmeng ti ipattignay aat di angah di tagu, ya henen angahna goh ya umat hinan halmeng ti ipattignay aat nan adi mattig an nomnomna. 
Nan linala'i ya mid apogpogan di amnawda an umat ay da Atayan ay A'ubahan an mid apogpogan di tatagun middum ay dida. 
Nan apuy di mun'anang hinan balitu' ya silver, mu hay mun'anang hinan aat di tagu ya nan hapihapiton di tataguy amaphod di pangatna. 
Nan tagun nakudang di nomnomna ya ta"on un way mamaligat an manaplat ay hiya ta engganay un mun'ugung ya adi damdama maluman di aatna an adi umat hinan paguy an wa ay ta nabayuh nan luhung ya mahinhin nan bogah hinan dugi. 
Mahapul an ipapto'mun halimunan nan a'animalmun kalnilu ya gandeng 
ti nan inadangyan ya mapogpog an umat hinan punhaadan di ali an adi minaynayun. 
At wa ay ta nalpah an indadaanmu nan do'ol an holo' an mumballun wah nan dudunduntug ta waday ipa'anmuh nan a'animalyu 
ya mabalin mahkay an ipiyammam di lubungyu an malpuh nan dutdut di kalnilum, ya mabalin goh an ila'um di udumnan gandengmu ta nan la'uda ya hiyay epla'muh luta. 
Ya nan udum an ma'angang hinan gandeng di hiyay pangngalanyuh gatas hi inumonyun hina"ama ya an amin nan nekkop ay da'yun binabai. 
