﻿Proverbs.
23.
Wada ay di mangayag ay he"ah nan nabagtuy haadnan tagu ta me"an'an hiya ya nomnomom ta ipaphodmuy atom an mangan. 
At ta"on hi un'a na'ahhinaangan ya mahapul an ane'nongom di onom. 
Ya adim ilomo' an pun'iya'an hinan mumpolhat an indadaana ti mid mapto' ya un hay pampongnan he"a. 
Adim idugah an paligaton di odolmun muntamu an gapuh nan pamhodmun umadangyan. At nomnomom an henen atom ya bo'on hiyay aptan. 
Ti nan inadangyan ya un himbumagga ya na'ubah an paddungnay napaya'an, at mumpangatayapda an ayda agila. 
Adi'a umuy me"an hinan tagun nunheglay ukuhna, ya adim amnawan nan mun'aphod an ma'an hi abungna an indadaana. 
Ya ta"on hi unna alyon ay he"ay, “Ma'a ta uminum'a ya nangan'a!” mu henen inalina ya bo'on hay nalpuh nomnomnan un pohod ti hay nonomnomona ya nan ananginan nan ma'an an indadaana. 
At munha'it di punnomnommuh unmu innilaon an nabalbaliyan'a, at mid mapto' ya pohdom an utaon nan inanmu, ya mi'id hulbin goh nan nangalyam ay hiyah, “Salamat ta pinangana'!” 
Adiyu tugunon nan tagun nakudang di nomnomna ti pihulona damdama nan maphod an itugunyu. 
Adiyu anon nan batun imbatno' din a'apuyuh din penghanan igad ta ipahligyu nan lutayu unu polhonyu nan lutan nan nguhu 
ti hi Apo Dios an mamaliw ay dida ya nidugah di abalinana, at Hiyay mangiballoh hinan atonyu, at moltaon da'yu. 
Ihamadyun unudon nan maphod an mitudtudun da'yu, ya pa'addonglonyuy hapiton nan nanomnoman. 
Adiyu higanan an mangilat hinan ung'ungngan imbaluyyu ti gulat ta huplitonyu at adina iyatoy. 
Ti henen atonyu ya ta way atonan man'ug hinan nappuhin ma'at an lummuh atayan. 
He"an imbaluy'u ya gulat ta manomnoman'a ta nahamad di pangatmu at nidugah di pun'am'amlonga'. 
Ya iyal'allanay amlong'uh un hay immannung di hapihapitom hi anomnoman. 
Adi'a umamoh an me'yat hinan nun'appuhin ato'aton nan tatagu ti od'odolnah unmu ihamhamad an gun mange'gon ay Apo Dios. 
Ti umat ay hinay atom at maphod di ma'at ay he"ah udum di algaw, at nan namnamaom hi ma'at ya adi mabahbah. 
He"an imbaluy'un lala'i ya ihamadmun donglon tun tugun'u ta manomnoman'a, ya adim layahan di aatmu ta nan maphod an pangatmuy inaynayunmu. 
Ya adi'a mitnud hinan tatagun mabubutong ya nun'a'uklung hi ma'an 
ti awni ya mawotwotda, ya gapu ta malmalo'dah a'alga'algaw at hay pumbalinandah umangunuh ya hay ilubungda ya nan nun'apa"in lubung. 
Donglom nan itugun amam ti hiyay dumalat ya un'a wada, ya ta"on hi un na'in'innah inam ya adim pihulon. 
Maphod hi un'a manomnoman ta innilaom di nahamad ya mumpatudu'a, ya ta"on hi unmu anuhan ta engganay mawadan amin daten he"a ya halimunam ahan ta adida mami'id. 
Umipa'amlong ay amana nan nanomnoman an lala'i ti nan nahamad an pangatnay mangipadenol ay hiya. 
At olom man ya ipa'amlongmu nan o'ommodmu, ya namama ay inam ti hiyay nangitungaw ay he"a. 
He"an imbaluy'un lala'i ya abulutom ahan ta ha"in di mangituduh atom, ya gunmu nomnomon nan pangat'u ta hiyay eng'enghom. 
Nan puta ya umat hi maluhung an bitu, ya nan umilugtap an babai ya umat hi bubun. 
At du'gom dida ti ay ihunay unda mumbota' an humod'ap hinan way balbaliyanda, at hiyaat unda dumo'ol di linala'ih mumpangilugtap hi a'ahawada. 
Hay inilayuh ngadan di maligligatan? Ya ngadan danen tatagun mi'id amlongdah nitaguanda, ya mi'hongngelda goh, ya ma'allilida, ya mun'alunggidan di odolda ti mi'papattoyda, ya bumubutag di matada? 
Hay ngadanda ya nan mabubutong ti uminu'inumdah numbino'ob'on an bumutong! 
At elanyu ta adi ayu mabalbaliyan hinan ma'inum an ta"on hi un mumbolah, ya ma'a'amnawan di tigawnah nan bahu, ya munlameeh an ma"aphod di tamtamna an umiknu'iknul di bagangmu. 
Ya manu ay alyo' hene ti awni ta mabiggat at nidugah an nappuhiy punle'nam an ay da'a inalat hinan ulog an waday habidungna. 
Ti wa ay ta mabutong'a ya nat'on di pannigmuh un way amangom, ya maluman goh di nomnommu, ya hinnat'on di hapitom. 
Ya hay punle'nam ya umat hinan umuta'utan nunlugan hinan pupul an wah nan baybay an punhinnigion di puo'. 
Ya alyom di, “Goh ya unna' nin nunhudpa', mu mi'id di munha'it! Ya nunhaplata' nin, mu agguy'u enelan! Goh ta mi'id olog'un bumangon ta way ato' goh an umuy uminum?” 
