﻿Psalms.
147.
Madayaw hi Apo Dios! Maphod un tu'u ikantay pundayaw tu'uh nan Dios tu'u! Immannung an maphod hi un tu'u dayawon Hiya! 
Hi Apo Dios ya pun'ipiyammana din nun'apa"id Jerusalem ti ibangngadnah di nan tatagunan nibalud hinan udum an babluy. 
Al'alu'ona nan munlungdaya, ya paphodona nan hugatda. 
Hi Apo Dios ya ninomnomna tuwaliy uyap di bittuan an ihinah ad daya, ya nginadnana didan amin. 
Na'abbagbagtu ya nidugah di abalinan nan Ap'apu tu'u, ya inilanan amin, ya adi malukud di anala'engna. 
Hi Apo Dios ya pa'abbaddangana nan nun'awotwot, mu hana ay an mumpahpahiya ya ipa'ampana dida. 
Mungkanta ayuh punyamanan, ya iddumyun tukalon nan alpah pundayawyun Hiya an Dios tu'u. 
Inhaninay bunut ad daya, ya limmunay udan an pananum hi luta, ya limmunay holo' hinan dudunduntug. 
Idatnay tanud di a'animal ya nan imbabaluy di gayang hi unda pumiyapiyak. 
Adi umipa'amlong ay Apo Dios di mabi'ah an kabayu ya nan natulid an titindalu 
ti hay umipa'amlong ay Hiya ya nan tatagun ipa'anhanday pangatandah nan pohdona ya nan mundenol hinan adi maluman an pamhodna. 
Da'yun iJerusalem, dayawonyu nan Ap'apu an Dios tu'u 
ti pa'ahhalimunan ditu'un tatagunan paddungnay inhamadnay pantaw di babluy tu'ud Jerusalem ta adi mabalin an hogpon ditu'uh nan buhul tu'u. Ya winagahan ditu'un tataguna, 
ya palenggoponay babluy tu'u, ya paphodonay inhabal tu'u an umat hi paguy ta do'ol di bot'on tu'u. 
Wa ay ta impiyuynay Uldinan amin hinan babluy hitun luta ya un mamengpenghan ya ma'unud nan inyuldina. 
Ya pun'ogahnay dalalluh tun luta ta ay na'ap'apan hi uloh ya ay nagab'unan hi dapul. 
Ya paddungay i"itang an batu nan dalallun pun'ogahna, ya mi'id di pa"edpol hi a'ayhugin nan ipa'alina. 
Wa ay ta imandalna ya umaliy dibdib ta ma'ubah nan dalallu ta mangenolwang nan wangwang. 
Impa'innilanay Tuguna ya tudtudunah nan holag Israel an tataguna. 
Dida ya anggay di nangatanah umat hina, at hiyanan agguy inilan di udum an tatagu hanan Tuguna. Madayaw hi Apo Dios! 
