﻿Psalms.
137.
Hidin inu'umbunanmih nan pingit di numbino'ob'on an wangwang ad Babylon ya kimmilakila amin munnomnomnom hinan babluymi an Zion. 
At inhabluymih din ayiw an poplar din alpami 
ti adimi pohdon an ikantaan nan buhulmin nangiyalin da'mih tu ta numbalin amin balud. Ya wa ayan inalidan da'miy, “Ikantaan da'mih aat di Zion!” 
Mu hay atonmin mangikantah pundayawmin Apo Dios hituh nan babluy di udum an tatagu? 
Ta"on atog hi un mami'id di la'eng'un muntukal hi alpah un'u du'gon he"a, Jerusalem an babluymi! 
Ya ta"on hi un mipuyut di dila' hinan tangngutangngu' hi un'u aliwan di aat ad Jerusalem an babluymih un hay udum an babluy di umipa'amlong ay ha"in! 
Apo Dios, nomnomom ni' din inat nan holag Edom hidin nangidoldolandah nan iBabylon ad Jerusalem an nuntu'u'dan inaliday, “Ubahonyuh nen babluyda! Ya pa"ionyun amin di a'abungdah engganah nipabunanda!” 
Da'yun tatagud Babylon, awniat mun'a'ubah ayu! At umamlong nan tagun mangiballoh hinan inatyun da'mi! 
Immannung an umamlong nan tagun mangibitug hinan imbabaluyyu ta matoyda! 
