﻿Psalms.
136.
Munyaman tu'u ay Apo Dios ti Hiya ya ma"aphod! 
Ya munyaman tu'uh nan na'abbagbagtun Dios. 
Ya munyaman tu'un Hiya an Ap'apun amin di a'ap'apu. 
Hiya ya anggay di nangat hinan umipanoh'a an adi abalinan di tagu. 
Limmunad abuniyan an dumalat di la'engna. 
Inyammanay nipabunan tun lutah nan bunol di baybay. 
Limmunay bulan ya algaw. 
Numbalinonay algaw an umat hi ap'apuh nan mapatal. 
Numbalinonay bulan ya bittuan an umat hi ap'apuh nan mahdom. 
Pinatoynay papangpangullun imbabaluy di i'Egypt. 
At enekakna nan holag Israel ad Egypt! 
Inusalnay nidugah an abalinanan nangipangulun didan tatagunan holag Israel an nakak hidi. 
Ya nunhiyanonay danum hinan Mumbolah an Baybay! 
Ya initnudna nan tatagunan bumad'ang. 
Mu inanudna nan tindalun di i'Egypt ya nan alida. 
Ya impanguluna goh nan tatagunan holag Israel an ene'wahdah nan mapulun. 
Ya numpatoyna nan a'ali an nidugah di abalinanda. 
Ya ta"on un din nundongol an ali ya pinatoyda. 
An didana da hi Sihon an alin nan holag Amor. 
Ya hi Og an alid Bashan. 
At impaboltanay babluydah nan tataguna. 
Indatnah den babluy hinan tatagunan holag Israel ta numbabluyanda. 
Agguy ditu'u din'ug an tatagunah din na'abakan tu'u. 
Binaliwan ditu'un Hiyah nan buhul tu'u. 
Ya indadaanay onon an amin di limmuna. 
At hiyanan munyaman tu'un Hiya an Dios ad abuniyan! 
