﻿Psalms.
129.
Hiyah te kantan ingkantan nan Hudyuh din nunti'idandan numbiyahen immuy ad Jerusalem. Ditu'un holag Israel ya alyon tu'uy, “Numpaligligat di buhul tu'un ditu'un nete"ah din paddungnay a'unga tu'u, 
mu agguy ditu'u inabalinan an inabak! 
Ya paddungnay numpangahalom di hugat hi bonog tu'uh inatda an umat hinan na'aladun payaw, 
mu na'ahhamad hi Apo Dios ti pinogpognay nihbutan tu'uh nan nun'appuhiy ugalidan tatagu! 
An amin ni' nan bumobohhol hinan iJerusalem ya ma'abakda ta lumayawda, 
ya an aminda ni' ya umatdah nan holo' an himmangaw hinan atap an ag'aga ya nalyaw, 
ya mi'id ah managgung an mangamung ta uyunona. 
Ya mi'id ni' mala'uh eden babluy nan buhul tu'uy mangali ay diday, Wagahan da'yun Apo Dios! unu, Wagahan da'yuh ngadan Apo Dios!” 
