﻿Psalms.
24.
Hete ya psalm an intudo' David. Tun luta ya an amin nan wah tun luta ya hakup Apo Dios, 
ya hanan limmuna ya nipognad hinan baybay. 
At ngadan udot di way biyangnan umuy hinan me'gonan an duntug Apo Dios, ya ngadan di way biyangnan humigup hinan Timpluna? 
Hay miyabulut ya ammuna nan nahamad di aatnan tagu an maphod di pangatna ya nomnomna, ya nan adi mundayaw hi bulul, ya nan adi munhapatah nan agguy immannung. 
Ya nan tagun mangat hi umat hina ya hiyay wagahan Apo Dios ta baliwana, ya ibilangnah maphod, 
at nan tagun umat hinay aatna di middum ay Apo Dios an din dinayaw Jacob. 
Ibughulyu hanan pantaw hidin penghana ta humigup nan na'abbagbagtun Ali! 
Mu hay ngadan ne han nabagbagtun Ali? Hi Apo Dios an nidugah di abalinana ya mangab'abak! 
At ipidwa' an mangalih ibughulyu hanan pantaw hidin penghana ta humigup nan na'abbagbagtun Ali! 
Mu ngadan ne han nabagtun Ali? Hi Apo Dios an nidugah di abalinana ya mangab'abak! 
